છ માસિક હિસાબો મંજૂર કરાશે તેમજ કારોબારી સમિતિમાં આવેલ નોંધ સહિત સભ્યોના કામોના ઠરાવ કરાશે
(વર્તમાન પ્રવાહ વાપી બ્યુરો)
વાપી, તા.11: વાપી નગરપાલિકાની આગામી તા.18 ઓક્ટોબરના રોજ દિવાળી પહેલાં સામાન્ય સભા યોજાનાર છે. છ માસિક હિસાબો સહિત એજન્ડા ઉપરના કામોની સામાન્ય સભામાં ચર્ચા-વિચારણા અને બહાલી આપવામાં આવશે.
વાપી નગરપાલિકાની સામાન્ય સભા આગામી તા.18મી ઓક્ટોબરને મંગળવારના દિવસે પાલિકા પ્રમુખ કાશ્મિરાબેન શાહની અધ્યક્ષતામાં યોજાનાર છે. આગામી ગુજરાત વિધાનસભાની ચૂંટણીનું જાહેરનામું બહાર પડે અને આચાર સંહિતા લાગુ થાય તે પહેલા સામાન્ય સભામાં રોડ, રસ્તા જેવા મહત્ત્મ કામોને બહાલી આપી દેવાશે તેમજ ચૂંટણી જાહેર થાય તે પહેલાં તમામ કામોનું ટેન્ડરીંગ અને વર્ક ઓર્ડર આપી કામો શરૂ કરી દેવાશે. સામાન્ય સભામાં છ માસિક હિસાબો મંજૂર કરવામાં આવશેતેમજ તા.11-10-2022ના રોજ મળેલી કારોબારી સમિતિની નોંધ અને વિવિધ સમિતિઓ દ્વારા રજૂ થયેલા કામોને વંચાણે લઈ જે તે ઠરાવ કરવામાં આવશે તેથી દિવાળી પહેલાંની આ સામાન્ય સભા મહત્ત્વની પુરવાર થઈ રહેશે.
