(વર્તમાન પ્રવાહ ન્યુઝ નેટવર્ક)
દમણ, તા.25 : દમણ બાલ ભવન ખાતે ચાલી રહેલા સમર કેમ્પ 2023 અંતર્ગત બાળકોને કચીગામ વિદ્યાલયમાં ચાલતી કન્સ્ટ્રક્શન સાઈટ પર લઈ જવામાં આવ્યા હતા. આ મુલાકાતમાં કોન્ટ્રાક્ટર શ્રી હિતેન્દ્ર પટેલ અને કન્સ્ટ્રક્શન સાઈટના ઈજનેર શ્રી ચિરાગ ભંડારીએ બાળકોને બાંધકામ બાબતે વિગતવાર સમજ આપી હતી. જેમાં બિલ્ડીંગમાં બની રહેલા તમામ વિભાગો વિશે જેમ કે બાળકોને લાઈટ ફીટીંગ, ઈંટ, પથ્થર કેવી રીતે લગાવા, સિમેન્ટનો માલ કેવી રીતે અનેકેટલા પ્રમાણમાં વાપરવો જેવી મહત્વની બાબતો જણાવીને કામ કરાવવામાં આવ્યું હતું.
આ મુલાકાતનો હેતુ બાળકોને જણાવવાનો હતો કે જે ઈમારતો અને મકાનો બની રહ્યા છે તે કેવી રીતે બને છે અને તેને બનાવવામાં કઈ સામગ્રીનો ઉપયોગ કરવામાં આવે છે. બાળકો એ નિહાળીને ખૂબ જ ખુશ થયા હતા અને તેઓએ પ્રશ્નો કર્યા કે અમે જે ઈમારત/મકાન/મકાનમાં રહીએ છીએ તે કેવું છે? તેમાં કેટલી સામગ્રી વપરાઈ હશે અને કેટલા લોકો તેમાં કામ કરે છે.
આ પ્રવાસને સફળ બનાવવા દમણ અને દીવના કાર્યપાલક ઈજનેર શ્રી હિતેશ ડુકાનો સંપૂર્ણ સહકાર હતો. બાદમાં તમામ બાળકોને ભોજન પણ આપવામાં આવ્યું હતું.
દમણ બાલ ભવન ખાતે 31મી મે સુધી ચાલનારા આ સમર કેમ્પમાં ભવિષ્યમાં પણ આવી પ્રવૃત્તિઓ કરવામાં આવશે.
