રાધાબેન ધર્મેશભાઈ નાયકા પિયરથી અતુલ કંપની જતા અકસ્માત નડયો
(વર્તમાન પ્રવાહ વાપી બ્યુરો)
વાપી, તા.31: પારડીના ડુમલાવ ગામે પિયરથી અતુલ કંપનીમાં નોકરીએ જવા ગત તા.28મીએ નિકળ્યા હતા ત્યારે તેમનું મોપેડ ઉબડખાબડ રસ્તામાં સ્લીપ મારી ગયું હતું. અકસ્માતમાં ગંભીર ઈજાઓ બાદ હોસ્પિટલ ખસેડાયા હતા. જ્યાં તેમનું સારવાર દરમિયાન મોત નિપજ્યું હતું.
પ્રાપ્ત વિગતો અનુસાર પારનેરામાં રહેતા 32 વર્ષિય રાધાબેન ધર્મેશભાઈ નાયકા પિયર ડુમલાવથી અતુલ કંપનીમાં નોકરી કરવા માટે તેમની મોપેડ નં.જીજે 15 ડી.આર. 1386 ઉપર નિકળ્યા હતા. રસ્તો ઉબડખાબડ હોવાથી અચાનક મોપેડ સ્લીપ મારી ગયું હતું. જેમાં નીચે પટકાતા રાધાબેન ગંભીર રીતે ઘવાયા હતા. પ્રથમ પારડી મોહન દયાળ હોસ્પિટલમાં સારવાર માટે ખસેડાયા હતા. બાદમાં વધુ સારવાર માટે રાધાબેનને વલસાડ કસ્તુરબા હોસ્પિટલમાં ખસેડાયા હતા. જ્યાં સારવારમાં તેમનું અવસાન થયું હતું. બાળકોએ માતાનું છત્ર ગુમાવતા પરિવાર શોકમાં ડૂબી ગયો હતો.