(વર્તમાન પ્રવાહ ન્યુઝ નેટવર્ક)
દમણ, તા.04 : દમણ પોલીસે એક મહિના પહેલાં ઘર છોડી ચાલી ગયેલી સગીરાને 1000 કિલોમીટરના અંતરથી શોધી કાઢી પોતાના માતા-પિતા સાથે મેળાપ કરાવવાનું ઉમદા કાર્ય કર્યું છે.
પ્રાપ્ત માહિતી પ્રમાણે ગત તા.3જી મેના રોજ ફરિયાદીએ પોતાની 15 વર્ષની દિકરી ઘર છોડીના ચાલી ગઈ હોવાની ફરિયાદ નોંધાવી હતી. જેના સંદર્ભમાં નાની દમણ પોલીસ સ્ટેશને આઈ.પી.સી.ની કલમ 363 અંતર્ગત ગુનો નોંધી તપાસ શરૂ કરી હતી.
નાની દમણ પોલીસ સ્ટાફે અલગ અલગ ટીમ બનાવી ગુમ થયેલ સગીરાની બાબતમાં વધુમાં વધુ જાણકારી મેળવી હતી અને પડોશી પોલીસ સ્ટેશનનો સંપર્ક કરી વધુ માહિતી પણ પ્રાપ્ત કરી હતી. તદ્ઉપરાંત ટેક્ષી સ્ટેન્ડ, બસ સ્ટેન્ડ, રીક્ષા સ્ટેન્ડ, રેલવે સ્ટેશન જેવા જાહેર સ્થળો તથા ફરિયાદીના પૈતૃક ગામમાં પણ શોધખોળ કરવામાં આવી હતી. પોતાના નજીકના મિત્રો અને સગાં-સંબંધીઓની પણ પૂછપરછ કરવામાં આવી હતી. દરેક જગ્યાએથી જાણકારી મેળવી મેળવેલા ટેક્નીકલ ડેટાનું વિશ્લેષણ કરી લગભગ એક મહિનાના અથાક પ્રયાસ બાદ સગીરા બાળકીને 1000 કિલોમીટર દૂર ગ્વાલિયર મધ્યપ્રદેશથી શોધી ગત તા.02 જૂનના રોજ નાની દમણ પોલીસ સ્ટેશનમાં લાવી સગીરાનો પોતાના પરિવાર સાથે મિલાપ કરાવ્યો હતો.
