(વર્તમાન પ્રવાહ ન્યુઝ નેટવર્ક)
દમણ, તા.05 : નાની દમણના કચીગામ ખાતે એક ખાનગી ફાર્મ હાઉસમાં મોજમસ્તી માટે આવેલા ગુજરાતના ઉમરસાડીના પટેલ પરિવારના એક 15 વર્ષિય કિશોરનું સ્વિમીંગ પુલમાં ડૂબવાથી મોત થયું હોવાની ફરિયાદ મોટી દમણ કોસ્ટલ પોલીસ સ્ટેશનમાં નોંધવામાં આવી છે.
પ્રાપ્ત માહિતી પ્રમાણે વલસાડના ઉમરસાડી ખાતે દેસાઈવાડમાંરહેતા 15 વર્ષિય નિવ સુભાષ પટેલનું ગત રાત્રિના લગભગ 10:00 વાગ્યે કચીગામ ફાર્મ હાઉસના સ્વિમીંગ પુલમાં ડૂબવાથી મોત થયું હતું. પ્રાપ્ત માહિતી પ્રમાણે નિવ સુભાષ પટેલ પોતાના પરિવારના 27 સભ્યો સાથે દમણના કચીગામમાં એક ખાનગી ફાર્મ હાઉસમાં પાર્ટી માટે આવ્યા હતા. પાર્ટીમાં પરિવારના 6 છોકરાઓ ફાર્મ હાઉસના સ્વિમીંગ પુલમાં નાહી રહ્યા હતા. આ દરમિયાન નિવ પટેલની માતા સાથે આવેલી મહિલાઓ સ્વિમીંગ પુલની બહાર ખુરશી ઉપર બેઠા હતા અને પુરૂષો ફાર્મ હાઉસની પાછળ તરફ ખાવાનું બનાવી રહ્યા હતા. આ દરમિયાન નિવ સુભાષ પટેલ અચાનક સ્વિમીંગ પુલમાં ન્હાતા ન્હાતા ડૂબી ગયો હતો. પરિવારજનોએ નિવને બહાર કાઢી હોશમાં લાવવાની કોશિષ કરી હતી પરંતુ તે હોશમાં નહીં આવતાં તેને મરવડની સરકારી હોસ્પિટલમાં લઈ જવાયો હતો. જ્યાં ઉપસ્થિત તબીબોએ મૃત ઘોષિત કર્યો હતો.
મોટી દમણ કોસ્ટલ પોલીસે અકસ્માત મોતનો ગુનો દાખલ કરી વધુ તપાસ શરૂ કરી છે.
