(વર્તમાન પ્રવાહ ન્યુઝ નેટવર્ક)
સેલવાસ, તા.05 : સેલવાસના હોરીઝોન હાઈટ્સ રેસિડન્ટ એસોસિએશન કો-ઓપરેટીવ હાઉસિંગ સોસાયટીના રહીશો દ્વારા સોસાયટીના મુખ્ય ગેટ પાસે વાઇનશોપ ખોલવાના વિરોધમાં જિલ્લા કલેક્ટર અને નગરપાલિકા તથા પોલીસ વિભાગને લેખિત રજૂઆત કરવામાં આવી છે.
રહિશોએ કરેલી લેખિત રજૂઆતમાં જણાવ્યા મુજબ અમારી સોસાયટીના અંતર્ગત એક શોપમાં સોસાયટીની અનુમતિ વગર વાઇનશોપનો વ્યવસાય ચાલુ કરવામાં આવી રહ્યો છે, જે સોસાયટીના મુખ્ય ગેટ નજીક છે. આ સંદર્ભે સોસાયટી દ્વારા અગાઉ પણ આવેદન પત્ર આપવામાં આવ્યું હતું. મુખ્ય ગેટ પાસે દારૂની દુકાન આવવાથી સોસાયટીમાં રહેતા પરિવાર અને આજુબાજુના પરિવારો પર નકારાત્મક પ્રભાવ પડશે. આ દરેક પરિવારના બાળકો, વડીલ લોકો અને મહિલાઓ માટે ઘણી પીડાદાયક છે સાથે જ નજીકમાં રહેતા યુવા પેઢી માટે પણ ખતરનાક સાબિત થઈ શકે છે. જે કારણથી સોસાયટીના ફલેટ અને દુકાનો તથા આસપાસની પ્રોપર્ટીનું મૂલ્યાંકન પણ ઓછું થઈ જશે, કારણ કે દારૂની દુકાનની આજુબાજુ કોઈપણ પરિવાર સાથે રહી શકે નહીં. અમારી સોસાયટીની સામે ભગવાન શ્રી હનુમાન મંદિર છે એવાપાવન ધાર્મિક જગ્યાની આજુબાજુ દારૂની દુકાન રહેવી જરા પણ ઉચિત નથી. તેથી આપને નિવેદન છે કે અમારા પરિવારની દરેક પ્રકારની સામાજીક અને આર્થિક સુરક્ષા, આરોગ્યને ધ્યાનમાં રાખી યોગ્ય કાર્યવાહી કરી આ વાઇનશોપને તાકિદે બંધ કરાવવામાં આવે અને સોસાયટી તથા આજુબાજુના પરિવારોના બાળકો વડીલો અને મહિલાઓને સુરક્ષિત કરવામાં આવે.
