-
ટ્રાફિક નિયમ ભંગ કરતા વાહન ચાલકોને રાખડી બાંધી વચન બદ્ધ કર્યા
-
તમામ વાહન ચાલકોએ પણ કાર્ય ને બિરદાવી પોતાની ભૂલો સ્વીકારી ટ્રાફિક નિયમોનું પાલન કરવાનું વચન આપ્યું
(વર્તમાન પ્રવાહ ન્યુઝ નેટવર્ક)
પારડી, તા.11: મહાભારત કાળથી સમગ્ર ભારતમાં રક્ષાબંધનનો તહેવાર કોઈ પણ જાતના જાતપાત વિના મનાવવામાં આવે છે. આજે બહેનોએ પોતાના લાડકવાયા ભાઈઓને રાખડી બાંધી તેમના લાંબા આયુષ્ય માટે ભગવાનને પ્રાર્થના કરી પોતાની સુરક્ષાનું વચન માગે છે.
વલસાડ જિલ્લાના પારડી પોલીસ સ્ટેશનની મહિલા પોલીસકર્મીઓએ પણ આજે રક્ષાબંધનના પર્વની વિશેષ રીતે ઉજવણી કરી એક નવો જ ચીલો ચિતર્યો છે. રક્ષાબંધનના દિવસે પારડીમાં મહિલા પોલીસ દ્વારા શહેરના જાહેર માર્ગો પર ટ્રાફિક નિયમોનો ભંગ કરતા વાહનચાલકોને ઉભા રાખી અને તેમને મહિલા પોલીસ દ્વારા હાથે રાખડી બાંધી વાહનચાલકોના લાંબા આયુષ્ય માટે પ્રાર્થના કરી હવે પછી ટ્રાફિકના નિયમોનું પાલન કરવા માટેનું વચન માંગ્યું હતું. વાહનચાલકો પણ પોલીસની આ પહેલને બીરદાવી હતી અને તેઓએ આભાર માની આગામી સમયમાં ટ્રાફિકના નિયમોનુંપાલન કરવાનું વચન આપ્યું હતું. સાથે સાથે પારડી પોલીસ લોકઅપમાં રહેલ આરોપીઓને રક્ષાસૂત્ર બાંધી પુનઃ ગુના નહીં કરવા અને સતમાર્ગે જીવન વિતાવવાના સંકલ્પ સાથે રક્ષાબંધનનો પવિત્ર તહેવાર ઉજવવામાં આવ્યો હતો.
—-