શોધખોળ બાદ માતા-પિતાએ પારડી પોલીસ મથકે નોંધાવી ફરિયાદ
(વર્તમાન પ્રવાહ ન્યુઝ નેટવર્ક)
પારડી, તા.08: પારડી શહેરમાં ડીસીઓ સ્કૂલની બાજુમાં નિલેષભાઈ કિકુંભાઈ પટેલ તેમની પત્ની વાસંતીબેન અને 20 વર્ષીય પુત્ર વિવેક અને 21 વર્ષીય દીકરી ભાવિકાબેન સાથે રહે છે. નિલેષભાઈ અને તેમનો પુત્ર અને પત્ની નોકરી કરતાં હોય તેવો નોકરી ઉપર ગત તા.6 જૂનના રોજ સવારે ઘરેથી નીકળ્યા હતા. ત્યારે તેમની 21 વર્ષીય દીકરી ભાવિકાબેન ઘરે એકલી હાજર હતી. તે કોઈ કારણોસર ઘરે તાળું મારી ઘર છોડી લાપતા થઈ હતી. સાંજે નિલેષભાઈ અને તેમના પરિવારના સભ્યો નોકરી પરથી આવી ઘર બંધ જોતાં આજુબાજુ તેમની દીકરી ભાવિકાબેનની શોધખોળ હાથ ધરી હતી. સગા સંબંધીઓને ત્યાં પણ ભાવિકાબેનની ભાળ ન મળતા ગુરુવારના રોજ પારડી પોલીસ મથકે તેમની દીકરી લાપતા થઈ હોવાની ફરિયાદ નોંધાવી છે. ભાવિકાબેન વિશે કોઈને કશી માહિતી હોય અથવા તે કશે ધ્યાને ચઢે તો પારડી પોલીસનો સંપર્ક કરવા અપીલ કરવામાં આવી છે.
