(વર્તમાન પ્રવાહ ન્યુઝ નેટવર્ક)
દમણ, 09 : પૂણેમાં 4 થી 7 જૂન દરમિયાન યોજાયેલી નેશનલ જૂનિયર ગર્લ્સ રગ્બી ચેમ્પિયનશિપમાં કેન્દ્ર શાસિત પ્રદેશ દાદરા નગર હવેલી અને દમણ અને દીવની રગ્બી ટીમે તેલંગાણાની રગ્બી ટીમને 10-0થી હરાવીને પ્રદેશનું ગૌરવ વધાર્યું હતું. આજે સંઘપ્રદેશના રગ્બી એસોસિએશનના પ્રમુખ શૌકત મીઠાણીની અધ્યક્ષતામાં ખેલાડીઓ અને એસોસિએશનના સભ્યો માટે સન્માન સમારોહનું આયોજન કરવામાં આવ્યું હતું. આ પ્રસંગે શ્રી શૌકત મીઠાણીએ ખેલાડીઓને અભિનંદન પાઠવ્યા હતા.
પ્રાપ્ત માહિતી મુજબ મહારાષ્ટ્રના પુણેમાં 5 થી 7 જૂન દરમિયાન રગ્બી જુનિયર ગર્લ્સ નેશનલ ચેમ્પિયનશિપનું આયોજન કરવામાં આવ્યું હતું, જેમાં સમગ્ર ભારતમાંથી 30 થી વધુ રાજ્યોની ટીમોએ ભાગ લીધો હતો. આ સ્પર્ધામાં પ્રથમ વખત દમણની છોકરીઓની ટીમે ભાગ લીધો હતો.રાષ્ટ્રીય ચેમ્પિયનશિપમાં પ્રથમ વખત રમી રહેલા રગ્બી ખેલાડીઓએ તેલંગાણા સામેની મેચ 10-0ના સ્કોરથી જીતી હતી.
શ્રી શૌકત મીઠાણીએ રાષ્ટ્રીય ચેમ્પિયનશિપમાં ભાગ લઈને કેન્દ્ર શાસિત દાદરા નગર હવેલી અને દમણ-દીવનું નામ રોશન કરનાર તમામ ગર્લ્સ ખેલાડીઓને અભિનંદન પાઠવ્યા હતા. ભાજપ સ્પોર્ટ્સ સેલના પ્રભારી એલેક્સ થોમસે તમામ ખેલાડીઓને માર્ગદર્શન પુરૂં પાડયું હતું. તેમણે દાદરા નગર હવેલી અને દમણ-દીવ માટે તેમના અમૂલ્ય સમર્થન અને માર્ગદર્શન બદલ રગ્બી ઈન્ડિયાના પ્રમુખ શ્રી રાહુલ બોઝનો આભાર વ્યક્ત કર્યો.