શેરીમાળનો સુભાષ બુઢીયા પટેલ પત્ની-પુત્ર સાથે ધરમપુર સાસરી જવા નિકળેલ ત્યારે કરુણ અકસ્માત સર્જાયો
(વર્તમાન પ્રવાહ વાપી બ્યુરો)
વાપી, તા.27: ધરમપુર શેરીમાળ ગામનો યુવાન મોપેડ ઉપર પત્ની-પુત્ર સાથે ધરમપુર સાસરી જવા નિકળેલ ત્યારે આસુરા ગામે હનુમાન મંદિર પાસે પુરઝડપે આવી રહેલ ઈકો કારના ચાલકે મોપેડને ટક્કર મારી દેતા અકસ્માત સર્જાયો હતો.અકસ્માતમાં પતિ-પત્ની અને પુત્ર નીચે પટકાતા ગંભીર ઈજા થતા તાત્કાલિક સાંઈનાથ હોસ્પિટલમાં સારવાર માટે ખસેડાયેલા. જ્યાં સારવારમાં પતિનું કરુણ મોત નિપજ્યું હતું.
કરુણ અકસ્માતની પ્રાપ્ત વિગતો મુજબ ધરમપુર શેરીમાળ ગામના રહીશ સુભાષ બુધીયાભાઈ પટેલ ઉ.વ.32 ઘરેથી તેમની મોપેડ નં.જીજે 15 એ.જે. 3675 લઈને ધરમપુર રાજમહેલ રોડ કાશી ફળીયા સાસરી જવા નિકળ્યા હતા ત્યારે આસુરા ગામે ઈકો કાર નં.જીજે 21 એ.જી. 0789ના ચાલકે ટક્કર મારી દેતા પતિ-પત્ની અને પુત્ર અકસ્માતમાં નીચે પટકાયા હતા. તાત્કાલિક ત્રણેયને ધરમપુર સાંઈનાથ હોસ્પિટલમાં ખસેડાયા હતા. જ્યાં સારવારમાં પતિ સુભાષનું કરુણ મોત નિપજ્યું હતું. અકસ્માતને લઈ ગામમાં શોક પથરાઈ જવા પામ્યો હતો.
