ગાંધીનગરમાં યોજાયેલ કાર્યક્રમમાં શ્રેષ્ઠ કલાકાર સહિત વિવિધ 46 કેટેગરીમાં 181 ચલચિત્રોને પારિતોષિક અર્પણ
રોંગ સાઈડ રાજુ, લવની ભવાઈ અને રેલા- હેલ્લારોને મળ્યો શ્રેષ્ઠ ફિલ્મ એવોર્ડ
(વર્તમાન પ્રવાહ વાપી બ્યુરો)
વાપી, તા.27: ગાંધીનગરમાં રાજ્યના નાણાંમંત્રી શ્રી કનુભાઈ દેસાઈની વિશેષ ઉપસ્થિતિમાં ગુજરાતી ચલચિત્રોના કલાકાર-કસબીઓને પારિતોષિક અર્પણ કરવાનો સમારોહ સ્વર્ણિમ સંકુલ-2 ખાતે આજે યોજાયો હતો. જેમાંનાણાંમંત્રી સહિત ઉપસ્થિત મહાનુભાવોના હસ્તે પારિતોષિક અર્પણ કરવામાં આવ્યા હતા.
પારિતોષિક અર્પણ થયેલા તમામ કલાકારોને શુભેચ્છા પાઠવતા નાણાંમંત્રી શ્રી કનુભાઈ દેસાઈએ જણાવ્યું હતું કે, મુખ્યમંત્રી ભુપેન્દ્રભાઈ પટેલની આગેવાનીમાં ગત વર્ષ ગુજરાતમાં પ્રથમવાર સિનેમેટિક ટુરિઝમ પોલીસી અમલ કરાઈ છે. ગુજરાતી ફિલ્મો માટે પ્રતિબધ્ધતા દાખવી સરકારે ફિલ્મ નિર્માણ ક્ષેત્રે ઈકો સિસ્ટમ ઉભી કરીને ફિલ્મ ઈન્ફ્રાસ્ટ્રક્ચરનો પણ વિકાસ કર્યો છે. અનેક લોકોને ગુજરાતી ફિલ્મ ઉદ્યોગ માત્ર આજીવિકાનું સાધન નહી પણ ફિલ્મ ઉદ્યોગને સાંકળી રોજગારીની નવી તકો સાથે રાજ્યના પ્રવાસનને પણ વેગ આપવામાં આવી રહ્યો છે.
