(વર્તમાન પ્રવાહ ન્યુઝ નેટવર્ક)
સેલવાસ, તા.29 : સંઘપ્રદેશ દાદરા નગર હવેલીમાં છેલ્લા 24 કલાક દરમિયાન ચાર ઇંચ જેટલો વરસાદ વરસ્યો હતો. ખેતીલાયક વરસાદ વરસવાના કારણે ખેડૂતોમાં આનંદની લાગણી જોવા મળી રહી છે. ખેડૂતોએ વાવણી કરવા સહિતખેતરમાં ખેડવાની અને ડાંગર-નાગલીનું ધરૂ ઉછેરવાની તૈયારી આરંભી દીધી છે.
આજે સેલવાસમાં 102.2 એમએમ એટલે કે, ચાર ઇંચ વરસાદ નોંધાયો છે. જ્યારે ખાનવેલ વિસ્તારમાં 52.2 એમએમ એટલે કે બે ઇંચથી વધુ વરસાદ થયો છે. દક્ષિણ ગુજરાત, સંઘપ્રદેશની જીવાદોરી એવા મધુબન ડેમનું લેવલ 66.50 મીટર છે અને ડેમમાં પાણીની આવક 2126 ક્યુસેક જ્યારે પાણીની જાવક 212 ક્યુસેક નોંધાઈ છે.
દાનહમાં સતત ચાર દિવસથી પડી રહેલ વરસાદના કારણે કેટલાક વિસ્તારના રસ્તાઓ જર્જરીત બની જવા પામ્યા છે. જેમાં લુહારી ફાટકથી ખરડપાડા તરફ જતો રસ્તો પણ બિસ્માર થઈ ગયો છે. ખખડધજ ચાર કિલોમીટરના રસ્તાને કાપતા 20 મિનિટથી વધુ સમય નીકળી જાય છે.
