આર.બી.આઈ.એ જારી કરેલ 15.27 ટકા સીઆરએઆરઃ બેંક માટે આવકારદાયક દર
(વર્તમાન પ્રવાહ ન્યુઝ નેટવર્ક)
દમણ, તા.02: સંઘપ્રદેશ દાદરા નગર હવેલી અને દમણ-દીવની એક માત્ર સહકારી બેંક દમણ-દીવ સ્ટેટ કો-ઓપરેટિવ બેંકે નાણાંકીય વર્ષ 2023-24ના પહેલાં ત્રિમાસિક ગાળામાં 1 એપ્રિલ- 2023થી 30 જૂન-2023 સુધી રૂા.3.70 કરોડનો નફો રળ્યો છે. તેની સાથે પ્રથમ ત્રિમાસિક ગાળામાં 37.40 લાખ રૂપિયાની શેર કેપિટલમાં પણ વધારો કરીશેર કેપિટલને 20.68 કરોડ રૂપિયા સુધી પહોંચાડયો છે.
ગત નાણાંકીય વર્ષ 2022-23માં બેંકે 9.45 કરોડ રૂપિયાનો નફો રળી શેરધારકો અને ગ્રાહકોનો વિશ્વાસ હાંસલ કર્યો હતો. ગત વર્ષની માફક આ વર્ષે પણ દમણ-દીવ સ્ટેટ કો-ઓપરેટિવ બેંકે 2022-23 માટે પણ કાનૂની ઓડિટમાં ‘બી’ ગ્રેડ જાળવી રાખ્યો છે. જે બેંક માટે મોટી સફળતા માનવામાં આવે છે.
રિઝર્વ બેંક ઓફ ઈન્ડિયા દ્વારા હાલમાં જ કાનૂની ઓડિટર દ્વારા સીઆરએઆર 15.27 ટકા જારી કર્યો છે જે ઘણો આવકારદાયક છે.
અત્રે યાદ રહે કે, જૂન, 2020માં સંઘપ્રદેશના પ્રશાસક શ્રી પ્રફુલભાઈ પટેલે દમણ-દીવ સ્ટેટ કો-ઓપરેટિવ બેંકનું સંચાલન ગવર્નિંગ બોડી પાસેથી લઈ પ્રશાસનના હાથોમાં લઈ લીધું હતું. ત્યારથી બેંકનું ભાગ્ય પણ ઉઘડી ગયું છે અને ઉત્તરોત્તર પ્રગતિ પણ થઈ રહી છે.
