(વર્તમાન પ્રવાહ વાપી બ્યુરો)
વાપી, તા.25: વાપી નગરપાલિકા દ્વારા ‘સ્વછતા હી સેવા’ પખવાડિયા અંતર્ગત સુરત ઝોન પ્રાદેશિક કમિશ્નરશ્રી, ડૉ. ડી.ડી. કાપડિયાની ઉપસ્થિતિમાં પૂરગ્રસ્ત વિસ્તારમાં કામગીરી કરનાર સફાઈ કામદારોનું સન્માન કરવામાં આવ્યું હતું. હાલમાં ‘સ્વછતા હી સેવા’ અંતર્ગત ચાલી રહેલ સફાઈ અભિયાન અંતર્ગત પ્રાદેશિક કમિશ્નરશ્રી સુરત કે જેઓ વાપી નગર પાલિકાની મુલાકાતે પધાર્યા હતા. ચીફ ઓફિસર શ્રી શૈલેષ પટેલે સ્વાગત પ્રવચન કર્યું હતું. આ પ્રસંગે ડૉ. ડી.ડી. કાપડિયા તથા મહાનુભાવોના હસ્તે થોડા દિવસ અગાઉ ભરૂચ અને અંકલેશ્વર પૂરગ્રસ્ત વિસ્તારમાં સફાઈકામગીરી કરનાર દરેકને સન્માનપત્ર ઉપરાંત પુરુષ સફાઈ કામદારોને શાલ તથા મહિલા કામદારોને સાડી આપી સન્માન કરવામાં આવ્યું હતું. આ પ્રસંગે નગરપાલિકા પ્રમુખ શ્રીમતી કાશ્મીરાબેન શાહે અગાઉ સફાઈ કામદારોએ વલસાડ ખાતે પણ પૂર વખતે કરેલ સફાઈ કામગીરી યાદ કરીને એમને બિરદાવ્યા હતા. પ્રાદેશિક કમિશ્નરશ્રી સુરત ડૉ. ડી.ડી. કાપડિયાએ પોતે ભરૂચ અને અંકલેશ્વર વિસ્તારના પૂરગ્રસ્ત વિસ્તારમાં કરેલ નિરીક્ષણ દરમ્યાન કામદારોની કામગીરી સારી હોવાની પ્રશંસા કરી હતી. આ કાર્યક્રમમાં ઉપપ્રમુખ શ્રી અભયભાઈ શાહ, બાંધકામ ચેરમેન શ્રી જયેશભાઈ કંસારા, પાણી સમિતિ ચેરમેન શ્રી કૌશિકભાઈ પટેલ તથા પાલિકાના ચેરમેનશ્રીઓ, સભ્યશ્રીઓ અને કર્મચારીઓ મોટી સંખ્યામાં ઉપસ્થિત રહ્યા હતા. કાર્યક્રમનું સંચાલન અને આભારવિધિ ઓફિસ સુપ્રિન્ટેન્ડન્ટ શ્રી રિતેશ વાળંદે કરી હતી.