ચોમાસામાં વરસતા વરસાદની તક લઈ પ્રદૂષિત પાણી ઠાલવવાની ચેષ્ઠા
(વર્તમાન પ્રવાહ વાપી બ્યુરો)
વાપી, તા.14: જી.પી.સી.બી. અને વી.આઈ.એ. લાખ ઉધામા કરે પરંતુ પ્રદૂષણ ફેલાવવાના માહિરોને જાણે કાયદાની કોઈ અસર જ નથી તેવું આજે શુક્રવારે સરેજાહેર રોડ ઉપર પ્રદૂષિત પીળુ પાણી રેલાઈ રહેલું જોવા મળ્યું હતું.
વાપી જી.આઈ.ડી.સી.માં કાર્યરત ખાસ કરીને કેમિકલ યુનિટો દ્વારા પ્રદૂષણ ઠેલાવવાની બુમાબુમ જુની છે. પ્રદૂષણ નિયંત્રિત થતું જોવા મળી રહ્યું નથી. જી.પી.સી.બી. અને વી.આઈ.એ. પ્રદૂષણકન્ટ્રોલ કરવાના અનેક ધમપછાડા કરી રહેલ છે પરંતુ પ્રદૂષણનું પાપ કરનારા અટકવાનું નામ નથી લઈ રહ્યા. આજે જી.આઈ.ડી.સી. વિસ્તારમાં ચાલુ વરસાદના પાણીમાં પીળા રંગનું પ્રદૂષિત પાણી બિન્દાસ ચાલી રહેલું જોવા મળી રહ્યું હતું. ક્લોઝર કે દંડની જાણે કોઈ પરવા જ ના હોય તેમ પ્રદૂષણ અટકતું નથી તેનો આજે જીવંત દાખલો જોવા મળ્યો હતો. ડ્રેનેજની અંદર પીળુ પાણી વહી રહેલું જોવા મળ્યું હતું.
