જીઆઈડીસી, નોટિફાઈડ અને પોલીસે સંયુક્ત પણે ઓપરેશન હાથ ધર્યું
(વર્તમાન પ્રવાહ વાપી બ્યુરો)
વાપી, તા.18: વાપી ગુંજન વિસ્તારમાં પ્રતિદિન વકરેલી ટ્રાફિક સમસ્યાના ઉકેલ માટે આજે મંગળવારે વાપી વૈશાલી હાઈવે ચારરસ્તાથી છીરી સુધી રોડ ઉપરના ટ્રાફિકને નડતરરૂપ દબાણો હટાવવાની ઝુંબેશ હાથ ધરવામાં આવી હતી.
વાપી જીઆઈડીસી, નોટિફાઈડ અને પોલીસ દ્વારા સંયુક્ત હાથ ધરાયેલ દબાણ હટાવોઝુંબેશમાં દુકાનો સામે કરાયેલ છાપરા, દબાણો, હટાવાયા હતા. ગુંજન જીઆઈડીસી ટાઉનશીપનો હાર્દ સમાન વિસ્તાર છે. સવાર સાંજ લોકો ખરીદી માટે આવતા જતા રહે છે. બીજું ઔદ્યોગિક વસાહતમાં જવા આવવા માટે ગુંજનથી જ પસાર થવું પડે છે. તેથી સવારે પીકઅવર અને સાંજે ગુંજનમાં ટ્રાફિક સમસ્યા ઉદ્ભવતી રહેતી આવેલી છે. ક્યારેક તો પાર્કિંગ કરવાની પણ માથાકૂટ રહેતા ટુવ્હિલર કે ફોર વ્હિલર પાર્ક ક્યાં કરવું તેની જગ્યા પણ મળતી નહોતી. તેથી પોલીસ, નોટિફાઈડ અને જીઆઈડીસીએ આજે રોડ અંતરાયરૂપ દબાણો દુર કરવાની ઝુંબેશ હાથ ધરી હતી. તેથી ટ્રાફિક પીએસઆઈ કે.ડી. પંથ અને સ્ટાફે આજે વૈશાલી ચાર રસ્તાથી છીરી રોડ સુધીના દબાણો દુર કર્યા હતા. આ રોડ કોપરલી મેઈન રોડ પણ પહોવાથી બસો અને ગ્રામ્ય વાહનોની અવર જવર એવરેજ વધુ રહેતી હોવાથી ટ્રાફિકજામ વધુ રહેતો હતો.
