ગ્રામ પંચાયતની ઉદાસિનતાવચ્ચે ભંગારના ગોડાઉનો કચરો વરસાદમાં તણાઈ રહેણાંક વિસ્તારમાં વિસ્તર્યો
(વર્તમાન પ્રવાહ વાપી બ્યુરો)
વાપી, તા.20: વાપી કુદકે ભૂસકે વિકસી ચૂક્યુ છે તેની ના નહી પણ વાપી સાથે સંલગ્ન રહેલા સ્લમ વિસ્તારોની હાલત ધારાવી મુંબઈ જેવી છે. વાપી પાસે આવેલા છીરી ગામની સ્થિતિ બદ્દથી બદતર ગંદકી અને કચરાના અંબાર મોટાભાગના રહેણાંક વિસ્તારમાં ઠલવાયેલા જોવા મળી રહ્યા છે.
છીરી એટલે મોટાભાગનો સ્લમ વિસ્તાર-મજૂરો અને કામદારોનો વિસ્તાર ધરાવતા છીરીમાં સામાન્ય રીતે કચરો રોડ કે રહેઠાણ વિસ્તારમાં જોવા મળે પણ અહીંથી આખે આખી ગટરો કચરાથી ઉભરાઈ ચૂકી છે તેમાં અતિશય વરસાદને કારણે પાણીના અયોગ્ય નિકાલને લઈ ઠેર ઠેર રહેઠાણ એરીયા પાણીમાં તરતા જોવા મળે છે. પંચાયતની બેદરકારી ગણો કે દિર્ઘદ્રષ્ટિનો અભાવ ગણો પણ સજા તો છીરીનો આમ આદમી ભોગવી રહ્યો છે. નાગરિકી સુવિધાઓ તો દૂર રહી પણ સામાન્ય જીવન જીવવું છીરી વિસ્તારમાં દોહ્યલુ બની ચૂક્યું છે. અહીં ગેરકાયદે ફાલી રહેલા અનિયંત્રિત ભંગારના ગોડાઉન પણ એટલા જ જવાબદાર છે. છેલ્લા કેટલાક વર્ષથી પંચાયતની એક હથ્થુ સત્તાએ છીરીને બેહાલ બનાવી દીધું છે.
