આરોપીઓ પાસેથી એક અપાચે મોટરસાયકલ અને બે મોબાઈલ જપ્ત કર્યા
(વર્તમાન પ્રવાહ ન્યુઝ નેટવર્ક)
દમણ, તા.04 : દમણ પોલીસે ફોનના માધ્યમથી ગ્રાહકનો સંપર્ક કરી મહિલાઓને અનૈતિક કાર્ય કરાવનારા બે શખ્સોની ધરપકડ કરી છે.
પ્રાપ્ત માહિતી પ્રમાણે દમણ પોલીસે એક ટીમ બનાવી ડમી ગ્રાહક દ્વારા અજ્ઞાત વ્યક્તિને ફોન કરી ત્રણબત્તી નાની દમણ ખાતે મહિલાને બોલાવવામાટેની ડીલ ફાઈનલ કરાઈ હતી. જેના અંતર્ગત એક વ્યક્તિ અપાચે કાળી અને લાલ મોટરસાયકલમાં બે છોકરીઓને લઈને ડમી ગ્રાહક પાસે આવ્યો હતો. જ્યાં પહેલાંથી જ પોલીસ હાજર હતી અને રેડ કરી છોકરીઓ સાથે વાતચીત દરમિયાન માહિતી મળી કે તેમની સાથે આવેલ વ્યક્તિ અને બીજા એક સાથી મિત્ર પોતાના આર્થિક ફાયદા માટે તેઓની પાસે અનૈતિક કાર્ય કરાવતા હતા. જેના સંદર્ભમાં દમણ પોલીસે ઈમમોરલ ટ્રાફિકિંગ (પી) એક્ટ 1956 અંતર્ગત ગુનો નોંધી મુસીદ ખાન અને રકીબુલ સિકંદરની ધરપકડ કરી છે અને તેમની પાસેથી અપાચે મોટરસાયકલ નંબર જીજે-15 જીજી-4429 અને બે મોબાઈલ ફોન જપ્ત કર્યા છે.