80 ટકા કામગીરી પૂર્ણ : નાણાંમંત્રી અને પાલિકા ટીમે સ્થળ વિઝિટ કરી કામગીરીનું નિરીક્ષણ કર્યું : 650 બેઠકની ક્ષમતા હશે
(વર્તમાન પ્રવાહ વાપી બ્યુરો)
વાપી, તા.07: વાપી વિસ્તારમાં અધ્યતન ઓડિટોરિયમની જરૂરીયાત હતી. આ જરૂરીયાત આગામી ડિસેમ્બર સુધી પૂર્ણ થઈ જશે. રોફેલ કોલેજ પાસે રૂા.20 કરોડના ખર્ચે આધુનિક-અધ્યતન ઓડિટોરિયમ હાલ પૂર્ણતાના આરે છે.
વાપીના શહેરીજનોને અધ્યતન ઓડિટોરિયમ મળે તે માટે મહત્ત્વનો આ પ્રોજેક્ટ હાલ નિર્માણાધિન છે. 20 કરોડને ખર્ચે તૈયાર થનાર ઓડિટોરિયમમાં વિવિધ સુવિધા ઉપલબ્ધ હશે. ઓડિટોરિયમ ડ્રોમ, સાઉન્ડ સિસ્ટમ નીચે બેઝમેન્ટ સ્ટોરેજ, વોટર હાર્વેસ્ટિંગ સિસ્ટમ, દિવ્યાંગો માટે અલગ શૌચાલય, જનરેટર, 200 વાહનોનું પાર્કિંગ તથા 650 બેઠકોની ક્ષમતા ઓડિટોરિયમમાં હશે. રવિવારે નાણાંમંત્રી કનુભાઈ દેસાઈ, પાલિકા પ્રમુખ કાશ્મિરાબેન શાહ, શહેર ભાજપપ્રમુખ સતિષ પટેલ, સહિતની ટીમે સ્થળ તપાસ કરી હતી. ઓડિટોરિયમ બિલ્ડીંગની મુલાકાત લઈ સુખાકારી સગવડ અંગે જરૂરી નિર્દેશ આપ્યા હતા. સરકારની મંજુરી બાદ પ્રોજેક્ટ પૂર્ણ થશે. આગામી ડિસેમ્બર સુધી પ્રોજેક્ટ પૂર્ણ કરવાનો લક્ષ્યાંક રખાયો છે.
