સરોધી હાઈવે ઉપર સ્થાનિકોના જણાવ્યા મુજબ આજે આ બીજો અકસ્માત છે
(વર્તમાન પ્રવાહ વાપી બ્યુરો)
વાપી, તા.06: નેશનલ હાઈવે વલસાડથી લઈ ભીલાડ સુધીમાં અનેક જીવલેણ ખાડા પડી ચૂક્યા છે. આ ખાડા રોજેરોજ અકસ્માત સર્જી રહ્યા છે તેવો વધુ એક ગંભીર અકસ્માત શનિવારે રાત્રે થયો હતો. મુંબઈથી અમદાવાદ તરફ જતા રોડ ઉપર સરોધી એકતા હોટલ સામે એક જીવલેણ ખાડાથી બચવા માટે કાર ચાલકે અચાનક બ્રેક મારતા પાછળથી આવતી અન્ય બે કાર સહિત ત્રણ કારો વચ્ચે અકસ્માત સર્જાયો હતો. અકસ્માતમાં અન્ય કોઈ જાનહાની થઈ નહોતી.
હાઈવે ઓથોરિટી સુવિધાયુક્ત હાઈવે આપવાનું તો દૂર રહ્યું છેતો બીજી તરફ ટોલટેક્ષ વધારવાનું ચાલુ રખાયું છે. પરિણામે હાઈવેની ઉપર ઠેર ઠેર વલસાડથી ભિલાડ સુધી જીવલેણ ખાડા પડી ચૂક્યા છે. જેમાં થઈ રહેલા વારંવાર અકસ્માતોમાં અનેક નિર્દોષના જીવ પણ ગુમાવ્યા છે. છતાં હાઈવે ઓથોરિટીની કામગીરી તસુભાર ફેર પડયો નથી. ગત રાત્રે સરોધી હાઈવે ઉપર જીવલેણ ખાડાને લઈ ત્રણ કાર વચ્ચે ગંભીર અકસ્માત સર્જાયો હતો. જેમાં ત્રણેય કાર નુકશાનગ્રસ્ત થઈ હતી. સ્થાનિકોએ જણાવ્યું હતું કે આજે આ બીજો બનાવ છે. ત્રણ ચાર કલાક પહેલાં જ અકસ્માત થયો હતો. હાઈવે ઉપર અન્ય કોઈ ઈમરજન્સી સેવાનો અભાવ ઠેર ઠેર જોવા મળી રહ્યો છે.