મોંઘા ભાવના ટામેટા ભરેલો ટ્રક બેંગ્લોરથી ભરૂચ જઈ રહ્યો હતો ત્યારે વલસાડ પહોંચતા હાઈવે પર ખાડામાં પટકાતા ડિવાઈડર કુદી બાજુની ટ્રેક ઉપર પલટી મારી જતા ચોકલેટ ભરેલ ટ્રક સાથે અથડાયેલ
(વર્તમાન પ્રવાહ વાપી બ્યુરો)
વાપી, તા.07: વલસાડ સુગર ફેક્ટરી પુલ પાસે રવિવારે મોડી રાત્રે ચાર વાહનો વચ્ચે ગંભીર અને વિચિત્ર અકસ્માત સર્જાયો હતો. ટામેટા ભરેલ ટેમ્પો ભરૂચ તરફ જઈ રહ્યો હતો ત્યારે હાઈવેની ભેટ એવા મોટા ખાડામાં ટેમ્પો પટકાતા પલટી મારી વિરૂધ્ધ ટ્રેક ઉપર પટકાયો અને ટ્રક સાથે ભટકાયો હતો. બે વાહનોના અકસ્માત વચ્ચે ડીઝાયર અને ક્રેટા કાર વચ્ચે સપડાતા કુલ ચાર વાહનો વચ્ચે અકસ્માત સર્જાયો હતો.
ગંભીર અકસ્માતની વિગતો મુજબ બેંગલોરથી ટામેટા ભરેલ આઈશર ટેમ્પો નં.જીજે 24 એક્સ 3731 ભરૂચ માર્કેટમાં ખાલી કરવા જઈ રહ્યો હતો ત્યારે વલસાડ હાઈવે સુગર ફેક્ટરી પુલ પાસે ટેમ્પોમાં તોતિંગ ખાડામાં પટકાતા ડિવાઈડર કુદી પલટી મારીને સામે આવતી ચોકલેટ ભરેલીટ્રક સાથે ભટકાયો હતો. ટ્રક નં.પીબી 10 જીકે 0968 પંજાબથી ચોકલેટ ભરી આવી રહ્યો હતો. બે મોટા વાહનોના અકસ્માત વચ્ચે મુંબઈ જઈ રહેલ ક્રિયેટા કાર નં.જીજે 05 આરટી 8418 અને ક્રેટા કાર નં.જીજે 15 સીએન 6126 પણ સાથે ભટકાઈ હતી. ચાર વાહોનના વચ્ચે સર્જાયેલ અકસ્માતમાં રોડ ઉપર ટામેટા અને વાહનો પડેલા હોવાથી હાઈવેને બંધ રખાયો હતો. કલાકોની જહેમત બાદ અકસ્માત ગ્રસ્ત વાહનો સાઈડીંગ કરી પોલીસે હાઈવે ખુલ્લો કરતા ટ્રાફિક સ્થિર થયો હતો.