દાનહ સાંસદના પી.એ. ગૌરાંગ સુરમા, આદિવાસી વિકાસ સંગઠનના સસ્પેન્ડ થયેલા મેનેજમેન્ટ માટે કામ કરતા ઈસ્લામ અલીની ચોરી પ્રકરણમાં મહત્ત્વની ભૂમિકા હોવાનું પોલીસ તપાસમાં ઉજાગર
(વર્તમાન પ્રવાહ ન્યુઝ નેટવર્ક)
સેલવાસ, તા.07 : સમગ્ર સંઘપ્રદેશમાં ચર્ચાના ચકડોળે ચડેલા દાદરા નગર હવેલી આદિવાસી વિકાસ સંગઠનના દસ્તાવેજો અને ઈલેક્ટ્રોનિક્સ ડિવાઈસિસ આદિવાસી ભવનમાંથી ચોરી પ્રકરણમાં આજે આરોપીઓને કોર્ટમાં રજૂ કરતાં નામદાર કોર્ટે ગૌરાંગ સુરમા, ઈસ્લામ અલી, જીતેન્દ્ર પટેલ અને દલપત પટેલને 9મી તારીખ સુધીના પોલીસ રિમાન્ડ આપવામાં આવ્યા છે. જ્યારે ધરપકડ કરાયેલા અન્ય પાંચ આરોપીઓને જ્યુડિશિયલ કસ્ટડીમાં ધકેલવામાં આવ્યા છે.
પ્રાપ્ત માહિતી પ્રમાણે આદિવાસી વિકાસ સંગઠનની દસ્તાવેજોની ચોરીના ગુનામાં દાનહ સાંસદના પી.એ. ગૌરાંગ સુરમા અને સસ્પેન્ડ થયેલા આદિવાસી વિકાસ સંગઠનનામેનેજમેન્ટ માટે કામ કરતા ઈસ્લામ અલી શેખની ભૂમિકા મહત્ત્વની હોવાનું પોલીસની પ્રારંભિક તપાસમાં બહાર આવ્યું છે.
દાનહ આદિવાસી વિકાસ સંગઠનના દસ્તાવેજો અને ઈલેક્ટ્રોનિક્સ ડિવાઈસિસની ચોરીનો મુદ્દો ખુબ જ સંવેદનશીલ હોવાથી પોલીસ તંત્ર પણ સંપૂર્ણ તકેદારી સાથે પોતાની ફરજ બજાવી રહ્યું છે અને આવતા દિવસોમાં મોટો ઘટસ્ફોટ થવાની શક્યતા નકારાતી નથી.