વાપીમાં અનેક જાહેર રસ્તા ઉપર ઢાંકણ વગરની ખુલ્લી ગટરો જોખમી બની રહેલ છે
(વર્તમાન પ્રવાહ વાપી બ્યુરો)
વાપી, તા.17: વાપીમાં જાહેર રોડો ઉપર અનેક જગ્યાએ ગટરો ઉપર ઢાંકણાનો અભાવ જોવા મળી રહ્યો છે. પરિણામે અકસ્માત સર્જાતા રહ્યા છે. ગતરોજ બલીઠા કોળીવાડમાં ગટર ઉપર ઢાંકણ નહી હોવાથી મહાકાય આખલો ગટરમાં ખાબકી ગયો હતો. મહામુસીબતે રેસ્ક્યુ કરીને બહાર કાઢવામાં આવ્યો હતો.
વાપી બલીઠા કોળીવાડ વિસ્તારમાં ગટરની કુંડી ઉપર ઢાંકણ નહી હોવાથી એક આખલો ગટરમાં ખાબકી ગયો હતો. સરપંચ સ્મિત માહ્યાવંશીએ વાપી એનિમલ રેસ્ક્યુ ટીમના વર્ધમાન શાહને ટેલિફોન કરીને ઘટનાની જાણ કરી હતી. રેસ્ક્યુ ટીમે ઘટના સ્થળે પહોંચી દોઢ-બે કલાકની જહેમત બાદ આખલાને બહાર કાઢયો હતો. મોટી મુશ્કેલી ઉભી ના થાય તે જે.સી.બી. અને ફાયર બ્રિગેડને સજ્જ રખાયા હતા. વાપીમાં અનેક જગ્યાએ ગટરોના ખુલ્લા ઢાંકણા અકસ્માતને આમંત્રણ આપી રહ્યા છે ત્યારે વહિવટી તંત્રએ જરૂરી પગલાં ભરવા કાર્યવાહી કરવી રહી.
