ત્રણ મકાનમાં સફળતા મળી : સીસીટીવીમાં ઘટના કેદ
(વર્તમાન પ્રવાહ વાપી બ્યુરો)
વાપી, તા.18: વલસાડમાં છેલ્લા કેટલાક સમયથી ઘરફોડ ચોરીઓના લગાતાર બનાવ બની રહ્યા છે. જે અટકવાનું નામ નથી. વધુ ઘરફોડ ચોરી વલસાડ અબ્રામા સ્થિત એક સોસાયટીમાં તસ્કરોએ ભારે તરખાટ મચાવી દીધો. એક, બે નહી પરંતુ ચાર-ચાર મકાનના એક સાથે તાળા તોડી ચોરી કરી પલાયન થઈ ગયા હતા.
પ્રાપ્ત વિગતો અનુસાર અબ્રામામાં આવેલા આર.એન. સૃષ્ટિ સોસાયટીમાં વિતેલી રાતે તસ્કરો ત્રાટક્યા હતા. બંગલા નં.76/4, 76/1, 107-એ અને 117-એના એક સાથે ચાર મકાનના તાળા તોડવામાં સફળ રહ્યા હતા તે પૈકી ત્રણ મકાનમાં કબાટ, તિજોરી, લોકર, પલંગ તોડફોડ કરી સરસામાન વેરવિખેર કરી નાની મોટી તમામ મકાનમાં ચોરી કરી હતી. જ્યારે એક મકાનનું તાળું તુટયું નહોતું. તસ્કરોની હિલચાલ સોસાયટીના સીસીટીવી કેમેરામાં કેદ થઈ ચૂકી હતી. અલબત્ત સીસીટીવી કેમેરા તોડી નાખ્યા હતા. પરંતુ એક કેમેરા બચી ગયેલો. તેમાં ઘટના કેદ થઈ ગઈ છે. ત્રણ મકાનમાં કેટલી કુલ ચોરી થઈ તેની ફરિયાદ નોંધાયા બાદ સાચી વિગતો બહારઆવશે.
