ભગોદમાં આવેલી સોલાન્સ ક્રિએટરમાં કોન્ટ્રાક્ટરે કામદારોને માર માર્યાનો આક્ષેપ
(વર્તમાન પ્રવાહ વાપી બ્યુરો)
વાપી, તા.18: કપરાડા તાલુકાના ભગોદમાં કાર્યરત સોલાન્સ ક્રિએટર કંપનીમાં છ કામદારોએ અન્ય ખાતામાં કામગીરી કરતા કંપનીના કોન્ટ્રાક્ટરે કામદારોને માર માર્યો હોવાનો મામલો પ્રકાશમાં આવતા ચકચાર મચી ગઈ હતી.
કપરાડાના ભગોદમાં કાર્યરત સોલાન્સ ક્રિએટર કંપનીમાં તણસાણીયા ગામના 6 યુવકો કંપનીમાં કામ કરવા ગયા હતા ત્યારે દત્તા નામના કોન્ટ્રાક્ટરે બીજા વિભાગમાં કેમ કામ કરો છો તેવા મુદ્દા ઉપર છ કામદારોને માર મારવામાં આવ્યો હતો. મૂળ વાત હતી બીજા ખાતામાં મહેનતાણું વધારે મળ્યું હોવાથી કામદારો ત્યાં કામ કરવા ઈચ્છતા હતા. ઘટના બાદ આદિવાસીઓ ઉપર અત્યાચાર કરવા જેવી ગંભીર બાબત બહાર આવી હતી. ઘટના અંગે મામાભાચા ગામના સરપંચ, નડગધરીના સરપંચ, બોપીના માજી સરપંચ નવસુભાઈ વિગેરેએ કોન્ટ્રાક્ટર વિરૂધ્ધ કાર્યવાહી કરવાની માંગણી કરી હતી.
