ચંચળબેન પટેલ અનુભવી ઠરેલ અને શિક્ષિત હોવાની સાથે દરેકને સાથે લઈને ચાલવાની નીતિ ધરાવતા હોવાથી આવતા દિવસોમાં દમણ જિલ્લા કોળી પટેલ સમાજરાજકીય ક્ષેત્રે પણ નિર્ણાયક ભૂમિકા ભજવશે
(વર્તમાન પ્રવાહ ન્યુઝ નેટવર્ક)
દમણ, તા.21 : દમણ જિલ્લા કોળી પટેલ સમાજના પ્રમુખ પદેથી બુદ્ધિજીવી અને સાક્ષર એવા ડો. નાનુભાઈ પટેલે લીધેલી સ્વૈચ્છિક નિવૃત્તિ બાદ તેમના સ્થાને શ્રીમતી ચંચળબેન પટેલની સર્વ સંમતિથી નિયુક્તિ કરવામાં આવી છે.
શ્રીમતી ચંચળબેન પટેલ સ્વયં શિક્ષિકા હોવાના નાતે સમાજને એક તાંતણે બાંધવાની કોઠાસૂઝ અવશ્ય ધરાવે છે અને તેઓ કોળી પટેલ સમાજના ભિષ્મ પિતામહ ગણાતા પૂર્વ સાંસદ સ્વ. ડાહ્યાભાઈ પટેલના ધર્મપત્ની હોવાથી સમાજના રાજકારણથી પણ પરિચિત છે.
દમણ જિલ્લા કોળી પટેલ સમાજના પ્રમુખ તરીકે શ્રીમતી ચંચળબેન પટેલની પસંદગી 2024 લોકસભા ચૂંટણીના ટાંકણે થઈ હોવાથી તેમની જવાબદારીમાં પણ વધારો થવાનો છે. કારણ કે, દમણ જિલ્લા કોળી પટેલ સમાજનું અસરકારક અને પ્રભાવશાળી નેતૃત્વ પુરૂં પાડવા તેમની વિશેષ જવાબદારી રહેશે.
શ્રીમતી ચંચળબેન પટેલ અનુભવી ઠરેલ શિક્ષિત અને દરેકને સાથે લઈને ચાલવાની નીતિ ધરાવતા હોવાથી આવતા દિવસોમાં દમણ જિલ્લા કોળી પટેલ સમાજ રાજકીય ક્ષેત્રે પણ પ્રદેશમાં એક નિર્ણાયક ભૂમિકા ભજવશે એવું આકલન વ્યક્ત થઈ રહ્યું છે.