મેસર્સ પી.એસ.એલ. કોરોઝન કંટ્રોલ સર્વિસિસ લિ.એ પોતાની બે કિલોમીટર દૂર આવેલ સિસ્ટર કન્સર્ન યુરોકોસ્ટિક પ્રોડક્ટ લિમિટેડ પાસેથી અન્ડરગ્રાઉન્ડ ગેરકાયદે રીતે ઈલેક્ટ્રીક વાયર ખેંચી પોતાની વિજળીની જરૂરિયાતની કરેલી પૂર્તિ
(વર્તમાન પ્રવાહ ન્યુઝ નેટવર્ક)
દમણ, તા.24 : સંઘપ્રદેશ પ્રશાસનની પોલ્યુશન કંટ્રોલ કમીટિ દ્વારા અધિકૃત લાઈટ કનેક્શન નહીં ધરાવતી કંપનીને પોતાના ઉત્પાદનના ઓપરેટ માટે કન્સેન્ટ અપાતા મોટા ભેદભરમની શક્યતા જોવાઈ રહી છે.
પ્રાપ્ત માહિતી પ્રમાણે નાની દમણના કચીગામ ખાતે ઝરી કોઝવે પાસે સર્વે નં. 377/2માં આવેલ મેસર્સ પી.એસ.એલ. કોરોઝન કંટ્રોલ સર્વિસિસ લિમિટેડ પાસે સંઘપ્રદેશ પ્રશાસનના વિદ્યુત વિભાગ અને હાલમાં દાદરા નગર હવેલી અને દમણ-દીવ પાવર ડિસ્ટ્રીબ્યુશન કોર્પોરેશન લિમિટેડ(ટોરેન્ટ પાવર)નું કોઈપણ પ્રકારનું અધિકૃત કનેક્શન નથી. છતાં દાદરા નગર હવેલી અને દમણ-દીવના પોલ્યુશન કંટ્રોલ વિભાગે કોઈપણ પ્રકારની ચકાસણી કર્યા વગર 28 ફેબ્રુઆરી, 2024 સુધી વાર્ષિક 3000મેટ્રિક ટનના મહત્તમ મશીનરી, ઈક્વિપમેન્ટ પાર્ટ વગેરેના ઉત્પાદનની અને ફેબ્રિકેશન ઓફ સ્ટ્રક્ચરલ સ્ટીલ આઈટમ એન્ડ એન્ટી કોરોઝીવ કોટિંગ ધેર ઓફ વાર્ષિક 12000 મેટ્રિક ટનના મહત્તમ ઉત્પાદન માટે કન્સેન્ટ જારી કરવામાં આવેલ છે.
સૂત્રો દ્વારા મળતી માહિતી પ્રમાણે કચીગામ નાની દમણ ખાતે ઝરી કોઝવે પાસે સર્વે નં. 377/2માં આવેલ મેસર્સ પી.એસ.એલ. કોરોઝન કંટ્રોલ સર્વિસિસ લિ. પાસે છેલ્લા 25 વર્ષથી વિદ્યુત વિભાગનું કોઈપણ પ્રકારનું અધિકૃત કનેક્શન નથી.
મળતી માહિતી પ્રમાણે મેસર્સ પી.એસ.એલ. કોરોઝન કંટ્રોલ સર્વિસિસ લિ.એ પોતાની બે કિલોમીટર દૂર આવેલ સિસ્ટર કન્સર્ન યુરોકોસ્ટિક પ્રોડક્ટ લિમિટેડ પાસેથી અન્ડરગ્રાઉન્ડ ગેરકાયદે રીતે ઈલેક્ટ્રીક વાયર ખેંચી પોતાની વિજળીની જરૂરિયાતની પૂર્તિ કરેલ છે. આ ષડ્યંત્રની જાણકારી દમણના લગભગ તમામ વરિષ્ઠ અધિકારીઓને હોવા છતાં આ કંપની સામે કોઈ પગલાં અત્યાર સુધી ભરાયા નથી તે ઘણું સૂચક છે.
