પ્રશાસકશ્રીએ સ્મૃતિ ભેટ આપી ગાયિકાનું કરેલું અભિવાદન
(વર્તમાન પ્રવાહ ન્યુઝ નેટવર્ક)
દમણ, તા.26: સંઘપ્રદેશના પ્રશાસકશ્રી પ્રફુલભાઈ પટેલના કુશળ નેતૃત્વમાં આયોજીત ‘મોન્સૂન ફેસ્ટિવલ’ને અપાર સફળતા અને લોકોનો પ્રેમ મળી રહ્યો છે. આજે દમણ ખાતે મોન્સૂન ફેસ્ટિવલમાં લાઈવ કોન્સર્ટ માટે આવેલ સુપ્રસિદ્ધ ગાયિકા શ્રેયા ઘોષાલે સંઘપ્રદેશના પ્રશાસક શ્રી પ્રફુલભાઈ પટેલની ગવર્નમેન્ટ હાઉસ ખાતે શુભેચ્છા મુલાકાત લીધી હતી. આ પ્રસંગે સંઘપ્રદેશના પ્રશાસકશ્રી પ્રફુલભાઈ પટેલે શ્રેયા ઘોષાલનું પુષ્પગુચ્છ અને શાલ ઓઢાડી અભિવાદન કર્યું હતું. તેમની સાથે તેમના પતિ શ્રી શિલાદિત્ય મુખોપાધ્યાય પણ ઉપસ્થિત રહ્યા હતા. સંઘપ્રદેશના પ્રશાસકશ્રીએ ગાયિકા શ્રેયા ઘોષાલને સ્મૃતિચિહ્ન પણ ભેટ કર્યું હતું.
