જિ.પં. પ્રમુખની બેઠક જનરલ જાહેર થતા રસાકસી વધી જશે
(વર્તમાન પ્રવાહ વાપી બ્યુરો)
વાપી, તા.29: આગામી સપ્ટેમ્બર મહિનામાં વલસાડ જિલ્લા પંચાયત અને છ તાલુકા પંચાયતના પ્રમુખની ટર્મ પુરી થતી હોવાથી નવા પ્રમુખો અંગે ચૂંટણી કાઉન્ટડાઉન રાજકીય ફલક ઉપર શરૂ થઈ ચૂક્યું છે.
વલસાડ જિલ્લા પંચાયત પ્રમુખ તરીકે ઉમરગામ તાલુકાને બે વાર, પારડી તાલુકાને એકવાર, વલસાડ, ધરમપુરના પણ પ્રમુખ રહી ચૂક્યા છે. આજ સુધી વાપી તાલુકો પ્રમુખ પદ માટે બાકાત રહેલ છે તેથી વાપી તાલુકામાંથી દાવેદારી થાય તેવું જણાઈ રહ્યું છે. બીજું જિ.પં. પ્રમુખની સામાન્ય બેઠક જાહેર થઈ હોવાથી રસાકસી વધુ સર્જાશે તેવા અણસાર સાંપડી રહ્યા છે. વલસાડ જિલ્લા પંચાયત સહિત છ તાલુકા પંચાયતોમાં ભાજપનું શાસન છે તેથી જિલ્લા ભાજપમાં આગામી આ ચૂંટણીમાં પ્રમુખ પદ મેળવવાનું લોબિંગ શરૂ થઈ રાજકારણે જોર પકડી લીધું છે. સ્થાનિક સ્વરાજની આ સંસ્થાઓમાં પદ મેળવવાની હવે હોડ જામવાની છે તે નક્કી છે. પરંતુ જિલ્લા પંચાયત પ્રમુખ પદમાં વાપી તાલુકો મેદાન મારી જાય તેવી શક્યતા અને અણસાર વર્તાઈ રહ્યા છે.
