તમામ રાજકીય પક્ષોના પ્રતિનિધિઓને પ્રથમ સ્તરીય તપાસ (એફ.એલ.સી.)ની બાબતમાં પાવર પોઈન્ટ પ્રેઝન્ટેશનના માધ્યમથી આપવામાં આવેલી જાણકારી
(વર્તમાન પ્રવાહ ન્યુઝ નેટવર્ક)
દમણ, તા.01 : આજે નાની દમણના કચીગામ ખાતે સચિવાલયના સભાખંડમાં દાદરા નગર હવેલી અને દમણ-દીવના મુખ્ય ચૂંટણી અધિકારી શ્રી ટી.અરૂણની અધ્યક્ષતામાં રાજકીય પક્ષોના પ્રતિનિધિઓ સાથે આગામી લોકસભા ચૂંટણી 2024ના સંદર્ભમાં એક બેઠકનું આયોજન કર્યું હતું. જેમાં સંયુક્ત મુખ્ય ચૂંટણી અધિકારી શ્રી આશિષ મોહન, નોડલ અધિકારી (ઈવીએમ), ભાજપનાપ્રદેશ અધ્યક્ષ શ્રી દીપેશભાઈ ટંડેલ, દમણ જિલ્લા ભાજપ અધ્યક્ષ શ્રી અસ્પીભાઈ દમણિયા, દમણ જિલ્લા ભાજપ મહામંત્રી શ્રી વિમલ પટેલ, શિવસેનાના પ્રતિનિધિ શ્રી અમ્રતલાલ પટેલ અને શ્રી ગુલાબ વિષ્ણુ પટેલ, નવસર્જન પાર્ટીના શ્રી મહેશકુમાર ઈશ્વરભાઈ પંચાલ, બહુજન સમાજ પાર્ટીના શ્રી પ્રભાકર અને સંદીપ બોરસાએ ભાગ લીધો હતો.
તમામ રાજકીય પક્ષના પ્રતિનિધિઓને પ્રથમ સ્તરીય તપાસ (એફ.એલ.સી.)ની બાબતમાં પાવર પોઈન્ટ પ્રેઝન્ટેશનના માધ્યમથી જાણકારી આપવામાં આવી હતી અને તેમના દાયિત્વની બાબતમાં માહિતગાર કરાયા હતા. આગામી લોકસભા ચૂંટણી 2024ના સંદર્ભમાં પ્રથમ સ્તરીય તપાસ (એફ.એલ.સી.) પ્રક્રિયામાં ભાગ લેવા માટે તમામ રાજકીય પક્ષોના પ્રતિનિધિઓને પ્રોત્સાહિત કરાયા હતા.