ફટાકડા વેપારીઓની સ્થિતિ કફોડી : અન્ય વિમા કંપની આગળ આવે
તેવી રજૂઆત કરાઈ
(વર્તમાન પ્રવાહ વાપી બ્યુરો)
વાપી, તા.26: દિવાળી નજીક આવતી હોવાથી ફટાકડાના વેપારીઓની હિલચાલ શરૂ થઈ ગઈ છે પરંતુ આ વર્ષે નવી મુસીબત સામે આવી છે. હંગામી ફટાકડા બજાર વલસાડમાં ચાલુ કરવામાટે વેપારીઓએ ઓરિએન્ટલ વિમા કંપની પાસે વિમો ઉતારવા ગયા ત્યારે કંપનીએ વિમો ઉતારવાની ના પાડી દેતા ફટાકડા વેપારીઓની હાલત કફોડી થવા પામી છે.
વલસાડમાં હંગામી ફટાકડા બજાર એસોસિએશનને ઓરિએન્ટલ ઈન્સ્યોરન્સ કંપનીને વિમા ઉતારવાની ના પાડી દીધા બાદ વેપારીઓ અખિલ ભારતીય ઉપભોક્તા ઉત્થાન સંગઠનના પ્રદેશ ઉપ પ્રમુખ વિજયકુમાર ગોયલને આ મામલે રજૂઆત કરી હતી તેથી ગોયલે વલસાડ કલેક્ટરને લેખિત રજૂઆત કરી માંગણી કરી છે કે ઓરિએન્ટલ વિમા કંપની હંગામી ફટાકડા બજારનો વિમો ના ઉતારતી હોય તો અન્ય કંપની વિમો ઉતારે તેવી વ્યવસ્થા સાથે ફટાકડાના વેપારીઓ સાથે મિટીંગ કરી મદદરૂપ થવાની વિજય ગોયલએ કલેક્ટરને લેખિત રજૂઆત કરી છે કે, કંપનીઓ આવું જડ વલણ અપનાવી શકે નહીં તેવું જણાવ્યું હતું.