(વર્તમાન પ્રવાહ ન્યુઝ નેટવર્ક)
દમણ, તા.27: ‘સ્વચ્છતા હી સેવા-2023′ અને ‘વિશ્વ પ્રવાસન દિવસ’ના ઉપલક્ષમાં દમણ જિલ્લાની તમામ 14 ગ્રામ પંચાયતોએ જમ્પોર અને દેવકા બીચ ખાતે બીચ ક્લીનિંગ અભિયાનનું આયોજન કર્યુંહતું.
દમણ જિલ્લાની તમામ 14 ગ્રામ પંચાયતોના સરપંચો, જિલ્લા પંચાયત સભ્યો, ગ્રામ પંચાયત સભ્યો, પંચાયત સ્ટાફ અને કર્મચારીઓ તથા સેલ્ફ હેલ્પ ગ્રુપની બહેનો દ્વારા પ્રવાસીઓને સ્વચ્છતા પ્રત્યે પ્રેરિત કરી અને તેમની સાથે મળી દમણના જમ્પોર અને દેવકા સમુદ્ર કાંઠાને ગંદકીથી મુક્ત બનાવવા સંપૂર્ણ પ્રયાસ કર્યો હતો.
બીચ ક્લીનિંગ ડ્રાઈવમાં 45 સેલ્ફ હેલ્પ ગ્રુપની બહેનો, પ્રવાસીઓ સહિત લોકોએ ખુબ જ ઉત્સાહભેર અભિયાનમાં ભાગ લીધો હતો. દમણમાં ફક્ત પ્રવાસનને જ ઉત્તેજન આપવા નહીં પરંતુ, દમણનો દરિયા કિનારો પણ ભવિષ્યમાં બ્લ્યુ ફલેગ સમુદ્ર તટમાં પ્રમાણિત થાય તે પ્રકારના પ્રયાસો શરૂ કરાયા છે.
