(વર્તમાન પ્રવાહ ન્યુઝ નેટવર્ક)
સેલવાસ, તા.02 : સંઘપ્રદેશ દાદરા નગરહવેલી અને દમણ-દીવના પ્રશાસક શ્રી પ્રફુલભાઈ પટેલના દિશાનિર્દેશ અને આરોગ્ય સચિવ, આરોગ્ય સલાહકાર અને કેન્દ્ર શાસિત પ્રદેશના પ્રોજેક્ટ ડાયરેક્ટરના માર્ગદર્શન અને દેખરેખ હેઠળ રાષ્ટ્રીય એઇડ્સ નિયંત્રણ ઇન્સ્ટિટયૂટ (NACO)ની ગાઈડલાઈન મુજબ રાજ્ય એઇડ્સ નિયંત્રણ સોસાયટી દ્વારા ‘‘અવેરનેસ ઓન એચઆઈવી/એઇડ્સ”ના માટે ‘રેડ રન મેરેથોન’નું આયોજન કરવામાં આવ્યું હતું, જેમાં કેન્દ્ર શાસિત પ્રદેશ દાદરા નગર હવેલી અને દમણ-દીવના તમામ રેડ રિબન ક્લબ હેઠળની તમામ કોલેજો અને તમામ સરકારી અને ખાનગી કોલેજોએ ભાગ લીધો હતો.
આ મેરેથોનમાં 17 કોલેજોના કુલ 1300થી વધુ યુવાવોએ ભાગ લીધો હતો. ઈવેન્ટ દરમિયાન, HIV/AIDS નિયંત્રણ, નિવારણ અને જાગૃતિ માટે વિવિધ ‘લિરિકલ પર્ફોર્મન્સ”, સ્કીટ્સ, ‘‘રોલ પ્લે” અને ‘‘વોર્મ અપ સેશન્સ”નું પણ આયોજન કરવામાં આવ્યું હતું.
આ સ્પર્ધા દરમિયાન સેલવાસના નિવાસી સબ-કલેક્ટર (RDC) સુશ્રી ચાર્મી પારેખ, દાનહ જિલ્લા પંચાયતના પ્રમુખ શ્રી દામજીભાઈ કુરાડા, નગરપાલિકાના ચીફ ઓફિસર, આરોગ્ય વિભાગના સલાહકાર, દાનહના મુખ્ય તબીબી અધિકારી, નમો ઇન્સ્ટિટયૂટ ઑફ મેડિકલ એજ્યુકેશનના ડીન અને પ્રોફેસરો અને વિવિધ વિભાગોના અધિકારીઓ તથા કર્મચારીઓ ઉપસ્થિત રહ્યા હતા.આ મેરેથોનની શરૂઆત સવારે 07:00 કલાકે સ્ટેડિયમ ગ્રાઉન્ડ સેલવાસથી થઈ હતી, આ 5 કિલોમીટરની મેરેથોનનો રૂટ કિલવાણી નાકા, ડોકમરડી બ્રિજ-પ્રભાત સ્કૂલ-ગાયત્રી મંદિર-આમલી ફાઉન્ટેન-ચાર રસ્તા-બસ સ્ટોપ-ટોકરખાડા થઈને કલેક્ટર કચેરી થઈને હતો. આ રેડ રન મેરેથોનમાં વિજેતા સ્પર્ધકો ઈનામો આપી સન્માનિત કરવામાં આવ્યા હતા. તેમજ આ સ્પર્ધામાં પ્રથમ ક્રમે આવનાર એક પુરુષ વિદ્યાર્થી અને એક મહિલા વિદ્યાર્થીને ગોવામાં યોજાનારી રાષ્ટ્રીય કક્ષાની સ્પર્ધામાં મોકલવામાં આવશે.
