(વર્તમાન પ્રવાહ ન્યુઝ નેટવર્ક)
પારડી, તા.04: પારડી પોલીસ મથકના પીઆઈના માર્ગદર્શન હેઠળ એએસઆઈ ચંદુભાઈ અને પોલીસ કોન્સ્ટેબલ ભરતસિંહ પેટ્રોલીંગમાં ફરતા હતા. આ દરમિયાન એક રિક્ષા નં.જીજે-15-એયુ- 8868માં કોથળા જીઈબીના ઈલેક્ટ્રીક મીટરો ભરી જઈ રહ્યો હોવાની માહિતી મળતા મોતીવાડા બ્રિજ પાસે વોચ ગોઠવી હતી અને બાતમી વાળી રીક્ષા આવતા અટકાવી જોતાં રિક્ષામાં કંતાનના કોથળા જીઈબીના ઈલેક્ટ્રીક અલગઅલગ વોલ્ટેજના મીટરો મળી આવ્યા હતા. જેથી રીક્ષા ચાલક કમલેશ શુક્કરભાઈ ગારીયા ઉ.વ. 40 રહે.ઓરવાડ ડુંગર ફળિયાની પોલીસે આ જીઈબીના મીટરો કયાંથી લાવ્યો અને કયાં લઈ જવાનો તેમજ બિલ જેવા આધાર પુરાવા માંગી આ વિશે પૂછપરછ કરતાં તેણે ગલ્લા તલ્લા કરી ઉડાવ જવાબો આપતા આ ઈલેક્ટ્રીક મીટરો ચોરી અથવા છળકપટથી મેળવ્યા હોવાનું જણાતા રૂા.50000 ની રિક્ષા અને 100 નંગ અલગ અલગ વોલ્ટેજના ઈલેક્ટ્રીક મીટરો જેની કિંમત રૂા.12000 મળી કુલ રૂા.62000 નો મુદ્દામાલ પારડી પોલીસે 41(1) ડી મુજબ તેમજ સીઆરપીસી 102 મુજબ કબજે લઈ અને ચાલકની ધરપકડ કરી છે. આ મીટરોમાં લાગેલી કોઈલ અને એલ્યુમિનિયમના પાર્ટની ભંગારના ભાવમાં સારી કિંમત મળતી હોય જેથી ચોરી અથવા છળ કપટથી મેળવ્યા હોવાનું હાલ લાગી રહ્યું છે. બાકી સત્ય હકીકત પોલીસની વધુ તપાસમાં જ બહાર આવશે.
