(વર્તમાન પ્રવાહ ન્યુઝ નેટવર્ક)
સેલવાસ, તા.12: દાદરા નગર હવેલીના બાલદેવીના રહેવાસી ટેમ્પો માલિકે મસાટ ગામે એક કંપની આગળ ટેમ્પો નંબર ડીએન-09 જે-9108 પાર્ક કર્યો હતો ત્યાંથી ચોરી થઈ જવાની ઘટના બની હતી. આ ઘટનામાં ચાર આરોપીઓની ધરપકડ કરવામાં આવી છે. આરોપીઓ પાસેથી ટેમ્પો સહિત મુદ્દામાલ જપ્ત કરવામાં આવ્યો છે.
પ્રાપ્ત વિગત અનુસાર ફરિયાદી લક્ષમણભાઈ પટેલ રહેવાસી કુવા ફળિયા બાલદેવી જેઓએ એમના ટેમ્પામાં પાંચ ટન આરપીઈટી ચિપ્સ ભરેલ અને મસાટ ગામે અમી પોલીમર કંપની પાસેપાર્ક કર્યો હતો, જે અજાણ્યા ઈસમો દ્વારા ચોરી કરેલ હોવાની ફરિયાદ નોંધાવી હતી. અજાણ્યા ચોરટાઓ વિરુદ્ધ આઈપીસી 379 મુજબ ગુનો દાખલ કર્યો હતો અને તપાસ એ.એસ.આઈ. શ્રી આર.ડી.રોહિતને સોંપવામાં આવી હતી.
તપાસ દરમ્યાન ચાર આરોપી (1)સિરાજ શીશમોહમ્મ્દ નસીબુલ (ઉ.વ.39) રહેવાસી હરિયા એન્ટરપ્રાઈઝ મેટરી ટાવર બસ સ્ટોપ વાપી, (2)આલમ નસીબુલ (ઉ.વ.27) રહેવાસી વિનુભાઈની ચાલ, મસાટ (3)પિન્ટુ રાજેશ યાદવ (ઉ.વ.22) રહેવાસી દીપકભાઈની ચાલ મસાટ અને (4)માહિબુલ્લા અસલમ નૂર મોહમ્મદ ખાન રહેવાસી ડુંગરા-વાપી જેઓ પાસેથી ટેમ્પા સાથે કુલ ચોરીનો સામાન અંદાજીત કિંમત 8,51,350 રૂપિયા જપ્ત કરવામાં આવ્યો હતો. આ બાબતે આગળની તપાસ મસાટ પોલીસ કરી રહી છે.
