અતિ વ્યસ્ત રોડ અને ટ્રાફિકની સમસ્યાને લઈને પોલીસે કરેલી કાર્યવાહી
(વર્તમાન પ્રવાહ વાપી બ્યુરો)
વાપી, તા.03 : વાપી સરકીટ હાઉસથી રેલવે સ્ટેશન રોડ ઉપર ટાઉન પોલીસે અતિક્રમણ હટાવાની આજે ઝુંબેશ ચલાવી હતી. રોડ ઉપરના દબાણો જે વેપારીઓ, દુકાનદારો દ્વારા કરવામાં આવેલ હતા તે દૂર કરાયા હતા.
વાપી રેલવે સ્ટેશન તરફ જતો રોડ અતિ વ્યસ્ત છે. રેલવે ફલાય ઓવરબ્રિજની ચાલતી કામગીરીને લઈ વાપી-પૂર્વ-પશ્ચિમની અવર જવર સરકીટ હાઉસથી રેલવે નાળા દ્વારા થઈ રહી છે. તેથી સરકીટ હાઉસથી સ્ટેશન તરફ જતા રોડ ઉપર રોજીંદો ટ્રાફિક જામ રહેતો હતો. વારંવાર આવતી જતી ટ્રેન સ્ટેશને થોભે એટલે હજારો મુસાફરો વાપી પૂર્વમાં જવાનો એક સાથે ધસારો રહેતા ટ્રાફિકની રોજીંદી સમસ્યા પેચીદી બની રહેતી તેથી વાપી પોલીસ સ્ટેશનથી સરકીટ હાઉસ સુધીના રોડની બન્ને તરફની દુકાનો કે વેપારીઓ દ્વારા કરાયેલ દબાણો પોલીસે દૂર કરાવી રોડની મૂળ સ્થિતિની પહોળાઈ ખુલ્લી કરી હતી. વાહન ચાલકોએ પોલીસની કામગીરીને બિરદાવી હતી.