તાલુકા પંચાયતનો લેટર બતાવી સરપંચોને સાથે રાખી કરતો હતો ચિટિંગ
પશુપાલક ખેડૂતોને 6,000 ની સબસીડી, ઘાસ કાપવાનુ મશીન, તથા અન્ય કીટ આપવાની આપી હતી લાલચ
અલગ અલગ ગામના ખેડૂત પશુપાલકો પાસેથી 3700, 7200 અને
12500 જેવી રકમ ઉઘરાવી
(વર્તમાન પ્રવાહ ન્યુઝ નેટવર્ક)
પારડી, તા.20: છેલ્લા કેટલાક સમયથી પારડી તાલુકાના વિવિધ 11 જેટલા ગામોમાં તાલુકાપંચાયતનો લેટર સરપંચોને બતાવી સરપંચોને સાથે રાખી પશુપાલક ખેડૂતો પાસે શ્રી શ્યામ સેવા સમિતિમાંથી આવતો હોવાનું કહી પોતાનું નામ રાજ હોવાનું ખોટું નામ જણાવી (સાચું નામ કૈલાશ શર્મા) ઉજ્વલા નામનું કુદરતી ઘાસ ગાયને ખવડાવવાથી ગાયના દૂધ અને તેના ઉત્પાદનમાં સારો ફરક પડતો હોવાનું જણાવી આવું ઘાસ અમારી સમિતિ લગાવી આપશે અને એક મહિના સુધી દેખરેખ પણ રાખશે હોવાનું જણાવી આ ઘાસ માટે પશુપાલક ખેડૂતો પાસેથી અલગ અલગ ગામમાંથી 3700, 7200 અને 12,500 જેવી રકમ ઉઘરાવી હતી.
સાથે સાથે દરેક પશુપાલક ખેડૂતોને એક કીટ તથા ઘાસ કાપવાનુ કટર મશીન અને સરકાર તરફથી 6000 રૂપિયાની સબસીડી પણ મળશે હોવાની લાલચ આપી આશરે 8 થી 10 લાખ રૂપિયા ઉઘરાવી પોતાનો મોબાઈલ સ્વીચ ઓફ કરી પલાયન થઈ ગયો હતો.
આજે તારીખ 20-12-2023 અને બુધવારના રોજ આ જ ઈસમ કપરાડા તાલુકામાં ફરી ત્યાંના પશુપાલક ખેડૂતોને છેતરી રહ્યો હોવાની જાણ થતા પારડી તાલુકાના સરપંચો તથા અન્ય પશુપાલકો કપરાડા પહોંચી ત્યાંના ખેડૂતો અને પશુપાલકોનો સાથ સહકાર મેળવી રાજ ઉર્ફે કૈલાસ શર્માને પકડી પારડી પોલીસને હવાલે કર્યો હતો.
