તમામ મુસાફરોને સલામત રીતે બહાર કઢાતા ચમત્કારિક બચાવ થયો
(વર્તમાન પ્રવાહ વાપી બ્યુરો)
વાપી, તા.27: કપરાડાથી નાસિક-શિરડી તરફ જઈ રહેલી લક્ઝરી બસ દાબખલ પાસેથી પસાર થતી હતી તે સમયે અચાનક બસમાં આગ ભભૂકી ઉઠતા ઘટના સ્થળે અફરા તફરી મચી જવા પામી હતી.
કપરાડાના દાબખલ નજીકથી આજે મળસ્કે લક્ઝરી બસ નં.એઆર 01 ટી 3269 પસાર થઈ રહી હતી ત્યારે બસમાં અચાનક ભિષણ આગ ભભુકી ઉઠી હતી. મળસ્કે બસમાં મુસાફરો મીઠી નિંદર માણી રહ્યા હતા ત્યાં કમનસીબ ઘટના ઘટી હતી. નાસિક-શિરડી તરફ જતી બસમાં આગ લાગ્યાની ઘટનાની જાણ ધરમપુર, વાપી, પારડી ફાયર બ્રિગેડને કરવામાં આવતા ફાયર બ્રિગેડ ઘટના સ્થળે ધસી આવ્યા હતા. બીજી તરફ બસમાં આગ લાગવાથી મુસાફરો બુમાબુમ અને ચીસો પાડી રહ્યા હતા. અન્ય વાહનો થોભીને મુસાફરોને સલામત રીતે બહાર કાઢવામાં આવ્યા હતા. પરંતુ આખી બસ બળીને ખાખ થઈ જતા મુસાફરોનો કિંમતી સામાન પણ બસમાં સ્વાહા થઈ ગયો હતો. કલાકોની જહેમત અને સતત પાણીનો મારો ચલાવી ફાયર ફાયટરોએ આગ ઉપર કાબુ કરી લીધો હતો.ધરમપુર પોલીસ ઘટના સ્થળે પહોંચી વધુ આગળની તપાસ હાથ ધરી હતી.
