(વર્તમાન પ્રવાહ ન્યુઝ નેટવર્ક)
પારડી, તા.11: પારડી શહેરમાંથી પસાર થતા નેશનલ હાઈવેના બંને તરફના સર્વિસ રોડ પર બનાવવામાં આવેલી ગટરના કેટલાક સ્થળે ઢાંકણો ગાયબ છે અને તૂટેલા છે. આ ખુલ્લી ગટરમાં અવાર નવાર અબોલા પશુઓ અને રાહદારીઓ પટકાઈ રહ્યા હોવા છતાં જવાબદાર તંત્રનું પેટનું પાણી હલતું નથી. ત્યારે ફરી એક વાર વલસાડ થી પારડી આવતા ચાર રસ્તાના ઓવરબ્રિજ નજીકના સરકારી અનાજ ગોડાઉન પાસે સર્વિસ રોડ પર આવેલી ગટરમાં એક આખલો પટકાયો હતો. જે અંદર પટકાયા બાદ આખી ઉંધી સ્થિતિમાં ફસી ગયો હોય બહાર પણ નીકળી શકયો ન હતો. ઊંધો પડેલો આખલા પર કોઈ વ્યક્તિનું આજે ધ્યાન પડતાં ગૌરક્ષક કિર્તિભાઈ ભંડારીને જાણ કરતા તેઓ તેમના સાથી મિત્રોરણછોડભાઈ, રાજેશ ગુપ્તા, સાથે દોડી ગયા હતા પરંતુ આસાનીથી આખલો બહાર કાઢી શકાય નહીં તેવું જણાતા તેઓએ પારડી પાલિકાને જાણ કરતાં પંકજભાઈ જેસીબી લઈ ઘટના સ્થળે પહોંચી ભારે જહેમતે આખલાને બહાર કાઢી ઈજાગ્રસ્ત એવા આખલાને પશુચિકિત્સક પાસે પ્રાથમિક સારવાર પણ કરાવી હતી.
