ડેપોમાં આવતી-જતી બસોને નડી રહેલો ટ્રાફિકઃ મનફાવે ત્યાં વાહન ઉભા રાખતા રીક્ષાચાલકો સહિત અન્ય વાહનચાલકો સામે પણ વાહનવ્યહાર વિભાગ અને ટ્રાફિક પોલીસ દ્વારા કાયદાકીય કાર્યવાહી કરવામાં આવે ઉઠેલી માંગ
(વર્તમાન પ્રવાહ ન્યુઝ નેટવર્ક)
સેલવાસ, તા.24 : સેલવાસ એસ.ટી. બસ ડેપોની સામે સાંજના સમયે પેસેન્જરોને શોધવા માટે વાપીથી આવતા રીક્ષાચાલકો ગેરકાયદેસર આડેધડ રીક્ષાઓ ઉભી રાખી દે છે, જેના કારણે એસ.પી.ડેપોમાં આવતી-જતી બસોને ભારે અડચણનો સામનો કરવા પડી રહ્યો છે.
અત્રેનોંધનીય છે કે, મોટાભાગના રિક્ષાચાલકો પોતાની રીક્ષાઓ રસ્તાની વચ્ચે જ ખડકી દેતા હોય છે. જેના કારણે પાછળથી આવતા વાહનચાલકોને પણ તકલીફ પડે છે. ઉપરાંત અહીં રીક્ષાઓના આડેધડ પાર્કિંગથી ભારે ટ્રાફિકજામની સમસ્યા પણ વારંવાર સર્જાઈ રહી છે.
અત્રે યાદ રહે કે, એક તરફ સંઘપ્રદેશ વાહનવ્યહાર અને પોલીસ વિભાગ દ્વારા પ્રદેશમાં ‘માર્ગ સુરક્ષા મહિના’ની ઉજવણી કરવામાં આવી છે જ્યારે બીજી તરફ આડેધડ વાહન પાર્કિંગ કરનારાઓ મનફાવે ત્યાં પોતાના વાહનો ખડકી દેતા હોય છે જેના કારણે અન્ય વાહનચાલકો તથા રાહદારીઓને ભારે અગવડતાનો સામનો કરવા પડે છે. તેથી દાદરા નગર હવેલી વાહનવ્યહાર વિભાગ અને ટ્રાફિક પોલીસ વિભાગ દ્વારા આવા આડેધડ મનફાવે ત્યાં પાર્કિંગ કરતા રીક્ષાચાલકો તથા અન્ય વાહનચાલકો સામે સખત કાયદેસરની કાર્યવાહી કરવામાં આવે જરૂરી બન્યું છે.
