ટ્રક ડ્રાઈવર ભાગી છુટયો જ્યારે કેબિનમાં ફસાયેલ ડ્રાઈવરને લોકોએ બહાર કાઢયો
(વર્તમાન પ્રવાહ ન્યુઝ નેટવર્ક)
પારડી, તા.09: આજરોજ વલસાડથી વાડીલાલ આઈસ્ક્રીમ ભરી એક આઈસર ટેમ્પો નં.જીજે-18-એઝેડ-5437 પારડી આવી રહ્યો હતોત્યારે પારડી આઈટીઆઈ નજીક નેશનલ હાઈવે પર આગળ ચાલતા એક ટ્રકે અચાનક બ્રેક મારતા આ આઈસ્ક્રીમ ભરેલો ટેમ્પો ધડાકાભેર ટ્રક પાછળ ઘૂસી ગયો હતો. અકસ્માત સર્જાતા જ ટ્રક ચાલક ટ્રક લઈ ફરાર થઈ ગયો હતો. પરંતુ ટેમ્પાના કેબિનના ભાગ ને ભારે નુકસાન પહોંચતા અને કેબિનનો ભાગ દબાઈ જતા ટેમ્પો ચાલક કેબિનમાં ફસાઈ જતા ભેગા થયેલા લોકોએ તેને બહાર કાઢયો હતો. અકસ્માતમાંફકત નાની મોટી ઈજા થતાં ટેમ્પો ચાલકનો ચમત્કારિક બચાવ થયો હતો. જ્યારે ટેમ્પાના રેફરિજેટરને નુકસાન ન પહોંચતા લાખોની કિંમતનો આઈસ્ક્રીમનો જથ્થો બચી ગયો હતો.