તાલુકા પંચાયતના પ્રમુખ પિયુષભાઈ માહલાની અધ્યક્ષતામાં યોજાયેલ સામાન્ય સભામાં અનેક સમસ્યાના મુદ્દાઓ ચર્ચાયા
(વર્તમાન પ્રવાહ વાપી બ્યુરો)
વાપી, તા.21 : અધ્યક્ષ શ્રી પિયુષભાઈ માહલાની અધ્યક્ષતામાં આજે ધરમપુર તાલુકા પંચાયતની સામાન્ય સભા પંચાયતના સભાખંડમાં યોજાઈ હતી. જેમાં વિકાસના અધુરા કામો સહિત વિવિધ સમસ્યાઓ અંગે રજૂઆત અને ચર્ચા થઈ હતી.
પ્રાપ્ત માહિતી પ્રમાણે તાલુકા પંચાયતના સભાખંડમાં સામાન્ય સભા યોજાઈ હતી, જેમાં અપક્ષ સભ્ય શ્રી કલ્પેશભાઈ પટેલ અને સભ્યોએ વિવિધ સમસ્યાઓ તથા વિકાસકામોમાં રહી ગયેલી ક્ષતિઓ બાબતે રજૂઆતો કરી હતી. રજૂ કરાયેલા પ્રશ્નોમાં મુખ્યત્વે આદિમજુથના લોકો માટે મંજુર થયેલા આવાસોના બાકી રહેલ લોકોને વહેલી તકે પ્રથમ હપ્તો જમા કરવો, તદઉપરાંત ધરમપુર તાલુકા સ્ટેટ હોસ્પિટલમાં બ્લડ બેંક ચાલુ કરવા સાથે મહેકમની મંજુરી તથા બ્લડ ચકાસણી પ્રમાણપત્ર સહિત આઈ.સી.યુ. અને ફિઝીશીયન તબીબની સુવિધાનો મુદ્દો પણ ગાજ્યોહતો. આ ઉપરાંત મૃગમાળ ગામે સસ્તા અનાજની દુકાન જે વિરવલમાં છે તેને અલગ કરવી, શાળાઓમાં જાતિનો દાખલો માંગવામાં આવે છે તેથી દાખલા માટે રજા પાડવી પડે છે તે અંગે વૈકલ્પિક સુવિધા બાબતે તા.પં.ની સામાન્ય સભામાં રજૂઆત થઈ હતી. એજન્ડા ઉપરના અન્ય કામોની પણ સભામાં ચર્ચા કરવામાં આવી હતી.
