(વર્તમાન પ્રવાહ વાપી બ્યુરો)
વાપી, તા.18: વાપી નગરપાલિકા દ્વારા માર્ચ એન્ડીંગ પહેલાં લક્ષાંક પુર્ણ કરવા માટે વેરા વસુલાત કામગીરી ટોપ ગેયરમાં ચલાવાઈ રહી છે. છેલ્લા બે દિવસમાં ડુંગરા વિસ્તારમાં વેરો ભરપાઈ નહી કરતા એવી 8 દુકાન અને 2 એકમોના નળ જોડાણ કાપી મિલકતોને સિલ મારી દેવાયા હતા.
વાપી નગરપાલિકા દ્વારા વેરા વસુલાતની કામગીરી હાલમાં ચરમ સીમાએ ચાલી રહી છે. ગયા સપ્તાહે 58 લાખના વેરા વસુલાત કરાયો હતો. ચલા વિસ્તારમાં ઘરવેરો નહી ભરનાર અભિષેક પાર્કને વારંવાર નોટિસો આપવા છતાં વેરો નહી ભરાતા પાણી વિભાગે બિલ્ડીંગનું નળ જોડાણ કાપી નાખ્યું હતું. આદિત્ય એવન્યુમાં 2 દુકાન, શ્રી રેસીડેન્સીમાં 2 દુકાન, શિવાલીકા એપાર્ટમેન્ટમાં એક દુકાનને તાળુ માર્યું હતું. ડુંગરા વિસ્તારમાં મિલકત વેરો વર્ષોથી નહીં ભરનાર દમણગંગા ઈન્ડસ્ટ્રીયલ પાર્કમાં 2 એકમોને તાળા મારી કાર્યવાહી કરાઈ હતી. તદ્દઉપરાંત દિલીપનગરમાં એક દુકાન, ડુંગરી ફળીયામાં એક દુકાન, ગુરુદેવ કોમ્પલેક્ષમાં એક દુકાન સીલ મારી દેવાઈ હતી. વેરો વસુલાતના વેગ માટે શનિ-રવિએ પણ વેરા ભરવાની કામગીરી પાલિકામાં ચાલુ રખાઈ છે.