(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.18: નોગામા ગામે દીપડાએ દૂધ આપતી બકરીને ફાડી ખાતા વૃધ્ધાએ આજીવિકા ગુમાવવાની નોબત આવી છે. વેટરનીટી તબીબ દ્વારા પીએમ કરવામાં આવ્યું હતું.
પ્રાપ્ત માહિતી અનુસાર ચીખલી તાલુકાના નોગામા ગામના કુંડળ ફળીયામાં રાત્રે બે એક વાગ્યાના અરસામાં વિધવા વૃદ્ધ મહિલા બુધીબેન શુક્કરભાઈ પટેલ (ઉ.વ.આ-70) ના ઘર નજીકના કોઢારામાં દીપડો આવી ચઢી દૂધ આપતી બકરીનો શિકાર કર્યો હતો. આ અંગેની જાણ વહેલી સવારે થતા સ્થાનિક આગેવાન ઉમેશભાઈ, તાલુકા સભ્ય હીનાબેન સહિતનાઓએ જાણ કરતા વેટરનીટી તબીબ કે.ડી.પટેલે સ્થળ પર પહોંચી પીએમ સહિતની કાર્યવાહી કરી હતી.
આ ઉપરાંત આરએફઓ આકાશભાઈની સૂચનાથી વન વિભાગ દ્વારા આ વિસ્તારમાં પાંજરૂ ગોઠવવામાં આવ્યું હતું. નોગામા ગામે દીપડાની રહેણાંક વિસ્તારમાં એન્ટ્રીથી સ્થાનિકોમાં ગભરાહટનો માહોલ સર્જાવા પામ્યો છે. ચાલુ વર્ષ તાલુકાના સંખ્યાબંધ ગામોમાં દીપડાઓના જાહેરમાં આંટાફેરા વધી જવા પામ્યા છે. વનવિભાગ દ્વારા હાલે કલીયારી, ખાંભડા, સુરખાઈ, અગાસી અને નોગામા મળી કુલ પાંચ જેટલા ગામોમાં દીપડો માટે પાંજરા ગોઠવવામાં આવ્યા હતા.