(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.27: પીપલગભણ ગામથી રૂમલાને જોડતા માર્ગ ઉપર આમધરા-મોગરાવાડી ગામની સીમમાંથી પસાર થતી ખરેરા નદી ઉપર લો-લેવલ પુલના સ્થાને 8.75 કરોડ રૂપિયાના ખર્ચે માર્ગમકાન વિભાગ દ્વારા હાલે પાંચ સ્પાનના મેજર બ્રિજનું બાંધકામ કરવામાં આવી રહ્યું છે. આ નવા બ્રિજના બાંધકામની લાઇન દોરીમાં જૂના લો-લેવલ પુલનો એપ્રોચ રોડ પણ આવતો હોય હાલની સ્થિતિ જોતા આ એપ્રોચ રોડને યોગ્ય ન કરવામાં આવે તો ચોમાસામાં વાહન વ્યવહાર જ બંધ થઈ જાય તેવા એંધાણ વર્તાય રહ્યાછે.
પીપલગભણ-આમધરા-મોગરાવાડી-રૂમલા માર્ગ આ વિસ્તારના લોકો માટે ખૂબ જ ઉપયોગી અને મહત્વનો છે. ખાસ કરીને ખેડૂતોને ખેતીકામ માટે વ્યાપક અવર જવર રહેતી હોય છે. અને ખેડૂતોને પોતાની ખેતીવાડીમાં જવા આવવા માટે આ ખરેરા નદી પરના લો-લેવલ પુલ સિવાય બીજો કોઈ વિકલ્પ પણ ન હોય તેવામાં ચોમાસા પૂર્વે માર્ગ મકાન દ્વારા જુના લો-લેવલ પુલને જોડતા એપ્રોચ રોડની કામગીરી પૂર્ણ કરાવી વાહન વ્યવહાર ચાલુ રહે તે માટે કવાયત કરે તે જરૂરી છે.
માર્ગ મકાનના નાયબ કાર્યપાલક ઈજનેર ભરતભાઈના જણાવ્યાનુસાર નવા પુલના બાંધકામની મુદત હજુ બાકી છે. ચોમાસા પૂર્વે હાલે જે એપ્રોચ રોડની સ્થિતિ છે. તેની ઉપર જીએસબી નાંખીને ચોમાસા દરમ્યાન વાહન વ્યવહાર જુના પુલ પરથી ચાલુ રહે તેવું આયોજન કરવામાં આવેલ છે.
