ગ્રામજનો સરપંચ સુરેખાબેન પટેલના ઘરે ધસી ગયા,
મોબાઈલ ટાવર અટકાવવા રજૂઆત કરી
(વર્તમાન પ્રવાહ વાપી બ્યુરો)
વાપી, તા.12: વલસાડ પાસે આવેલ પારનેરા પારડી ગામે એરટેલ કંપનીનો નવો ટાવર નાંખવાની તૈયારી પૂર્વે ગ્રામજનોએ વિરોધ કરવા મહિલા સરપંચનો ઘેરાવ કર્યો હતો. ગ્રામજનોએ નવા મોબાઈલ ટાવર વિરૂધ્ધ નારાજગી જતાવી હતી.
પારનેરા પારડી ગામે એરટેલ કંપનીનો નવો ટાવર નાખવાની હિલચાલ ગ્રામજનોને ધ્યાને આવતા મંગળવારે રાત્રે મહિલા સરપંચ સુરેખાબેન પટેલના ઘરે જઈ ઘેરાવ કર્યો હતો. ગ્રામજનોએ નવા મોબાઈલ ટાવર નાખવાની પંચાયત મંજુરી ના આપે તેવી રજૂઆત કરી હતી. કારણ કે ટાવરના રેડીએશનથી ગર્ભવતી મહિલા તથા બાળકોને આડઅસર કરે છે. આમ પણ રેલવેના ટાવર ચિંચવાડામાં કાર્યરત છે. નવા ટાવરથી પ્રદૂષણ વધશે. ગ્રામજનોની રજૂઆત સરપંચશ્રી સુરેખાબેન પટેલે શાંતિપૂર્વક સાંભળીને ટાવર નાખવાની પરમિશન નહી આપવામાં આવે તેવી બાહેંધરી આપતા મામલો થાળે પડયો હતો.
