(વર્તમાન પ્રવાહ વાપી બ્યુરો)
વાપી, તા.23: વલસાડ જિલ્લામાં આગામી તા.26 જૂન સુધી ભારે વરસાદની આગાહી હવામાન ખાતા દ્વારા કરવામાં આવી છે તે અનુસાર ઠેર ઠેર વરસાદ પડી રહ્યો છે. બીજી તરફ તિથલનો દરિયો તોફાની બન્યો હતો. આજે રવિવાર હોવાથી સંખ્યાબંધ સહેલાણીઓ દરિયા કિનારે ઉમટયા હોવાથી ઉછળતા દરિયાઈ મોજાથી ભયનો માહોલ છવાઈ જવા પામ્યો હતો.
પ્રશાસન દ્વારા તિથલ દરિયા કિનારે ચેતવણી સુચક બોર્ડ લગાવવામાં આવ્યા છે છતાં હજુ પણ સહેલાણીઓ દરિયાની મજા માણવાનું ચુકતા નથી. રવિવારે મોટી સંખ્યામાં સહેલાણીઓ ઉમટયા હતા. બાદમાં દરિયો તોફાની બન્યો હતો. ચારથી પાંચ ફૂટના મોજા ઉછળવા લાગ્યા બાદમાં સહેલાણીઓ સુરક્ષિત જગ્યાએ દોડાદોડી શરૂ કરી હતી. જો કે કોઈ અણબનાવ બન્યો નહોતો.
