અજાણ્યા રાહદારીએ યુવતી સાથે દુઃખદ ઘટના બને તે પહેલા 181 પર કોલ કરી સતર્કતા દાખવી
(વર્તમાન પ્રવાહ ન્યુઝ નેટવર્ક)
વલસાડ, તા.24: વલસાડ તાલુકાના એક ગામમાં રહેતી 27 વર્ષીય યુવતીને એક અજાણ્યા રાહદારીએ રસ્તા ઉપર નિઃસહાય અને દુઃખી હાલતમાં બેઠેલી જોઈ હતી. આ યુવતી સાથે કોઈ દુઃખદ ઘટના ન બને તેથી રાહદારીએ મદદ માટે 181 અભયમ મહિલા હેલ્પલાઈન પર કોલ કર્યો હતો. જેથી અભયમની ટીમે સ્થળ પર પહોંચી કાઉન્સેલિંગ કરતા યુવતીએ તેનું નામ સરનામું જણાવી દુઃખવ્યક્ત કર્યુ કે, મારી ઉંમર 27 વર્ષની થઈ ગઈ છે પરંતુ હજુ સુધી લગ્ન થયા નથી. પિતા કડક સ્વભાવના હોવાથી નાનો મોટો ઠપકો આપતા રહે છે. આજે પણ ઝગડો કર્યો હતો જેથી મન દુઃખ થતા પોતે ઘર છોડી નીકળી આવી હતી. અભયમની ટીમે સમજાવતા કહ્યું કે, ઘર છોડી નીકળી જવાથી કોઈ પણ મોટી દુર્ઘટના સર્જાઈ શકે છે જેથી યુવતીને તેના સરનામે લઈ જઈ માતા પિતાને સોંપી હતી અને માતા પિતાને પણ પોતાની દીકરીને સમજવા માટે કાઉન્સેલિંગ કરવામાં આવ્યું હતું. આમ, 181 અભયમ મહિલા હેલ્પલાઈન ટીમ દ્વારા યુવતીને સુરક્ષિત તેના માતા-પિતાને સોંપવામાં આવી હતી.
-000-
