હાજી તળાવ ફળીયાના નિવાસીઓ કુદરતી આફતમાં ઘર વિહોણા થયા
(વર્તમાન પ્રવાહ વાપી બ્યુરો)
વાપી, તા.02: વલસાડ જિલ્લામાં છેલ્લા ત્રણ દિવસથી સતત અતિવૃષ્ટિ થઈ રહી છે. લગાતાર દિવસ-રાત વરસાદ પડી રહ્યો છે ત્યારે જિલ્લામાં અતિવૃષ્ટિએ બેહાલી સર્જવી પણ શરૂ કરી છે. સોમવારે વલસાડના કુંડી ગામે એકાએક આવેલી કુદરતી આફતને લઈ ગામમાં દોડાદોડી મચી જવા પામી હતી. ઘટનામાં કોઈ જાનહાની થવા પામી નહોતી.
વલસાડના કુંડી ગામે સવારે 6 વાગ્યાના સુમારે વાવાઝોડા સાથે જોરદાર પવન ફુંકાવો શરૂ થયો હતો. જેમાં હાજી ફળીયા વિસ્તારમાં 10 થી 15 મકાનોના છાપરા ઉડયા હતા. એકાએક આવી પડેલી કુદરતી આફતથી ઘરોમાં રહેતા હેતબાઈ ગયા હતા. તોફાન એટલું ભારી હતું કે રસ્તાઓ ઉપર પણ પાણી ઘૂસી જતા ઘર સામાન્ અને રાચરચીલુ ભીંજાઈ ગયું હતું. દશ થી પંદર ઘરોના નિવાસીઓ એકાએક ઘર વિહોણા થયા હોય તેવી કારમી સ્થિતિ ઉભી થઈ હતી. ગામના આગેવાન અને લોકો દોડી આવ્યા હતા. શક્ય તેટલી મદદ શરૂ કરી દીધી હતી તેમજ ધારાસભ્ય તથા મામલતદાર, ડી.ડી.ઓ.ને પણસ્થિતિથી વાકેફ કરાયા હતા. પ્રશાસને મદદ આપવા માટે હા ભણી હતી.
