(વર્તમાન પ્રવાહ ન્યુઝ નેટવર્ક)
વલસાડ, તા.30: વલસાડ તાલુકાના પારનેરા ગામની સાર્વજનિક માધ્યમિક શાળા ખાતે વન ઔષધી વનસ્પતિઓનું પ્રદર્શન, અગત્સ્ય અને અતુલ ફાઉન્ડેશનના સહયોગથી રાખવામાં આવ્યું હતું. જેમાં વલસાડ જિલ્લા શિક્ષણ અધિકારીશ્રી ડો.રાજેશ્રીબેન ટંડેલના હસ્તે પ્રદર્શન ખુલ્લું મૂકવામાં આવ્યું હતું. તેમના દ્વારા ઔષધી વનસ્પતિની માહિતી અને ઓપન લેબ પ્રોજેક્ટની માહિતી આપી સાથે સાથે સંવેદના પેટીની સમજ બાળકોને ઉંડાણપૂર્વક આપી હતી.
ધોરણ 10 અને 12 ના વિદ્યાર્થીઓને બોર્ડની પરીક્ષાની તૈયારી માટેની માહિતી પણ આપવામાં આવી. શાળાના કોમ્પ્યુટર લેબનું ઉદ્ઘાટન પણ એમના હસ્તે કરવામાં આવ્યું હતું. જિલ્લા શિક્ષણાધિકારીશ્રીએ ઈલેક્ટ્રોનિક્સ અને એપરલ જેવા વોકેશનલ સબ્જેક્ટની લેબની પણ મુલાકાત લીધી હતી. આ સમયે શાળાના પ્રમુખશ્રી રાજુભાઈ પટેલ તથા ગામના સરપંચશ્રી ભરતભાઈ પટેલ, શાળાના આચાર્યશ્રી કિરીટકુમાર શાળાના શિક્ષકો તેમજ અગત્સ્યના રીઝનલ હેડ નિમેષભાઈ પટેલ (નવસારી) અને અન્ય મહાનુભાવો હાજર રહ્યા હતા. આ તબક્કે જિલ્લા શિક્ષણ અધિકારીશ્રી ડો.રાજેશ્રીબેન ટંડેલનો શાળા પરિવાર દ્વારા આભાર વ્યક્ત કરવામાં આવ્યો હતો.
